قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايرابايەۆ سەمەي قالاسىنداعى «Qazaq Astyq group» ج ش س ماي ەكستراكسيالىق زاۋىتىنا بارىپ، ەڭبەك ۇجىمىمەن كەزدەستى. بىلتىر ىسكە قوسىلعان ءوندىرىس وشاعى مايلى داقىلداردى وڭدەۋ باعىتىنداعى ءىرى ءارى زاماناۋي زاۋىتتاردىڭ ءبىرى.
كاسىپورىنداعى كۇنباعىس شيكىزاتىن وڭدەۋ قۋاتى تاۋلىگىنە 1000 توننانى قۇرايدى. دايىن ءونىم وتاندىق نارىقتان بولەك، تمد ەلدەرىنە ەكسپورتتالادى. قازىرگى ۋاقىتتا زاۋىتتا 400-گە جۋىق ادام ەڭبەك ەتەدى.
كانديداتپەن كەزدەسۋ بارىسىندا زاۋىت ۇجىمى وزدەرىنىڭ تۇيتكىلدى ماسەلەلەرىن بايانداپ، شەشۋ جولدارىن بىرلەسە قاراستىرۋعا نيەت ءبىلدىردى. زاۋىت باسشىلىعىنىڭ ايتۋىنشا بۇگىندە تولىقتاي وندىرىستىك قۋاتقا شىعۋ مۇمكىندىگى بولماي وتىر. وعان سەبەپ كەزىندە ۋكراينا ەلىنەن ساتىپ الىنعان جابدىقتارعا سايكەستىك سەرتيفيكاتىنىڭ جوقتىعى.
ءوز كەزەگىندە جيگۋلي دايرابايەۆ وتاندىق ءوندىرىس سالاسىنىڭ دامۋىنا ۇلەس قوسىپ جۇرگەن ءاربىر كاسىپورىنعا مەملەكەت قولداۋ كورسەتۋ قاجەت ەكەندىگىنە باسا نازار اۋداردى.
«ەلىمىزدىڭ وسىمدىك مايى وندىرىسىندە الەمدىك دەڭگەيگە كوتەرىلۋىنە كۇمان جوق. اۋىل شارۋاشىلىعى وندىرۋشىلەرىنە ۇلكەن كولەمدەگى ەكسپورتقا شىعۋعا مۇمكىندىك بار. ءوز كەزەگىندە مەملەكەتتىڭ ساياساتى ەگىستىك القابىن ءارتاراپتاندىرۋعا جانە ماي داقىلدارىن ءوسىرۋدى سۋبسيديالاۋعا باعىتتالۋى ءتيىس. وسىلايشا وسى سەكتورداعى يمپورتتىڭ ۇلەسىن ازايتۋعا جانە جەكە قايتا وڭدەۋشى ءوندىرىس وشاقتارىن دامىتۋعا سەپتىگىمىز تيەدى»، – دەيدى جيگۋلي دايرابايەۆ.
جيىن سوڭىندا كانديدات ءوزىنىڭ سايلاۋالدى باعدارلاماسىنىڭ نەگىزگى باعىتتارىنا توقتالىپ، سالانى دامىتۋ جولىنداعى جوسپارلارىمەن ءبولىستى. ال، زاۋىت ۇجىمى جيگۋلي دايرابايەۆتىڭ باستامالارىن قولداپ، ىسكە اسىرۋعا جاردەمدەسۋگە دايىن ەكەندىكتەرىن جەتكىزدى.