بۇل - ءبىزدىڭ ەل ازاماتتارىنىڭ عانا ەمەس، تۇركيا، موڭعوليا، جۇڭگو سياقتى الەمدەگى وزگە دە مەملەكەتتەردەن بارعان قانداستاردىڭ جالپى سانى.
ءقازىر ءتىل كۋرستارىنا دەگەن قاجەتتىلىك تۋىنداي باستادى. سەبەبى جات قۇرلىقتاعى بالا-شاعاسىن ءتۇپ-تامىرىنان اجىراتپاۋدىڭ قامىن ويلاپ جۇرگەن قازاق كوپ. ۆاشينگتون قالاسى مەن ۆيردجينيا جانە مەريلەند شتاتتارىندا تۇرىپ جاتقان قازاقتاردىڭ جيىنىندا وسى ماسەلە ءسوز بولدى. باسقوسۋدى قازاق-امەريكان قاۋىمداستىعى ۇيىمداستىردى، دەپ حابارلايدى Almaty-akshamy.kz 24.kz-كە سىلتەمە جاساپ.
بۇل – ءۇش جىلعى ۇزىلىستەن كەيىنگى باسقوسۋ. پاندەميا كەدەرگى كەلتىردى. ونىڭ ۇستىنە امەريكاداعى قاربالاس تىرلىكتەن دە ءجيى جۇزدەسۋگە ۋاقىت جوق. تابيعات اياسىنداعى كەزدەسۋگە اقش-تا جۇمىس بابىمەن جۇرگەن، ءبىلىم الىپ جاتقان، ءبىرجولا قونىس اۋدارعان، كوشسەم بە دەگەن قازاقتار كەلدى. وسى جاقتا تۇرمىس قۇرعان قىزدار دا قالىس قالمادى. ماقسات بىرەۋ – بارىنشا تىعىز ارالاسىپ، ءتىل مەن ءدىلدى ساقتاۋ. ءتۇپ-تامىرىن ۇمىتپاۋ.
قازاق-امەريكان قاۋىمداستىعى مۇنداي كەزدەسۋلەردى 20 جىل بۇرىن باستاعان. «بيىلعى باسقوسۋىمىز بۇرىن سوڭدى بولماعان، 100 جىلدا ءبىر قايتالاناتىن جىلى قاراشاعا ءدوپ كەلدى»، – دەيدى. ونى جاقسىلىققا بالادى. مۇنداعى وتباسىلار كەم دەگەنگە 3-4 بالا تاربيەلەپ وتىر. ويىن الاڭىندا ولاردىڭ اعىلشىنعا سۋداي ەكەنىن بايقايسىز. اتا-انا بالاسىنىڭ جات بولىپ كەتۋىنەن ساقتانادى. بۇلدىرشىندەرى قازاقىلىقتان اجىراپ قالماس ءۇشىن ءبىراز جوسپارلارى بار.
«ماقساتىمىز – ءتىلدى، ءداستۇردى ساقتاۋ. ءبىز قازاقپىز، ءبىز وتانىمىز، تامىرىمىز جوق ەمەس، ەلىمىز بار، تامىرىمىز بار، ءداستۇرىمىز بار دەپ جۇرەگى سوققان بالالاردىڭ وسكەنىن قالايمىز»، - دەدى قازاق-امەريكان قاۋىمداستىعىنىڭ پرەزيدەنتى دارحان نۇرماعامبەت.
امەريكانىڭ ەتنيكالىق توپتارى» دەپ اتالاتىن گارۆارد ەنسيكلوپەدياسىنداعى مالىمەت بويىنشا 1960 جىلدارى اقش-تا 20 شاقتى قازاق شاڭىراعى بولعان. ال ءقازىر شامامەن 100 مىڭعا جۋىقتادى. قازاق دياسپوراسى كوبىرەك شوعىرلانعان جەر نيۋ-يورك. Cودان كەيىن مايامي، فلوريدانىڭ وڭتۇستىك ايماعى، لوس-انجەلەس جانە چيكاگودا بار. اقش-داعى قازاقستاننىڭ ەلشىلىگى ولارعا جان-جاقتى كومەك كورسەتۋگە ءازىر.
«وتانداستار قورىمەن قۇرىپ جاتقان ءبىراز جوسپارلارىمىز بار. اقش جالپى سانى ءبىزدىڭ پايىمداۋىمىز بويىنشا 100 مىڭعا جۋىق قازاق ازاماتتارى بار. قازاقتىڭ امەريكاداعى ەڭ ۇلكەن شاڭىراعى ءبىزدىڭ ەلشىلىك دەپ بىلەمىز. اركىمگە ءبىزدىڭ ايتار ءسوزىمىز، ءار قازاعىم جالعىزىم دەپ قارايمىز»، - دەيدى قازاقستاننىڭ امەريكا قۇراما شتاتتارىنداعى توتەنشە جانە وكىلەتتى ەلشىسى ەرجان اشىقبايەۆ.
يميگرانتتار ەلىندە ءوزىنىڭ ءتىلى مەن ءدىلىن ساقتاپ تۇرىپ جاتقان تالاي ۇلت بار. ءبىراق جۇتىلىپ كەتكەندەر دە از ەمەس. سوندىقتان بەلگىلى جازۋشى مۇحتار ماعاۋين اركىم ۇرپاعىن قازاقى رۋحتا تاربيەلەۋ كەرەگىن ايتادى.
«ەمميگراسياعا كەتۋ، شەتكە كەتۋ بارلىق جۇرتتا بار قازاقتا دا ونى ەشكىم توقتاتا المايدى. بۇنى جاقسى دەپ تە جامان دەپ تە ايتۋعا بولمايدى. بۇل تابيعي نارسە، تابيعي جاعداي. ەڭ باستىسى، شەتكە كەتكەن قازاقتار ءوزىنىڭ ءتىلىن ساقتاۋ كەرەك. ءداستۇرىن، سالتىن ساقتاۋ كەرەك. بالالارىن قازاقى رۋحتا تاربيەلەۋ كەرەك»، - دەيدى قازاقستاننىڭ حالىق جازۋشىسى مۇحتار ماعاۋين.
جات قۇرلىقتا جۇتىلىپ كەتپەۋدىڭ جالعىز جولى وسى باستان بالا تاربيەسىنە ءمان بەرۋ. باس قوسقان قازاقتار وسىلاي دەپ تارقاستى.