«ءبىز تۇتىنۋشى ەمەس، ءوندىرۋشى مەملەكەتكە اينالۋىمىز كەرەك».
قاسىم-جومارت توقايەۆ.
الماتىداعى ىرگەلى يندۋستريالدى ايماقتا تەك ءىرى كومپانيالار عانا جۇمىس ىستەيدى دەسەك، قاتەلەسەمىز. ول جەردەن شاعىن كاسىپ اشىپ تا، دوڭگەلەتۋگە بولادى. ماسەلەن، بولمەلەردىڭ ەسىگىن جاسايتىن شاعىن فابريكا - سونىڭ جارقىن دالەلى.
وسى ورايدا ءسال شەگىنىس جاسايىق. مەملەكەتكە ماسىل بولماي، كاسىپ اشىپ، ءوز بەتىمىزشە كۇنىمىزدى كورسەك دەپ تالاپتانعان الماتىلىقتاردان «يندۋستريالدى ايماقتاعى شاعىن ونەركاسىپ پاركىنەن سەح نەمەسە شەبەرحانا اشا الامىز با، جولدارى قانداي؟» دەگەن ساۋالدار ءجيى تۇسەتىن كورىنەدى. سونى، ياعني شاعىن ونەركاسىپ پاركى قالاي جۇمىس ىستەيتىنى تۋرالى تۇسىندىرە كەتەيىك.
جالعا بەرۋشى الدىمەن وندىرىستىك ورىن (شاعىن ونەركاسىپتىك پارك) سالادى. وعان ينفراقۇرىلىم (جارىق، سۋ، گاز، كارىز قۇبىرىن، بايلانىس جانە ت.ب.) تارتادى. سوسىن وندىرىستىك ورىندى كۆادراتۋرا بويىنشا بولەدى جانە بيزنەسىمدى جۇرگىزەمىن دەگەن جاندارعا دايىن الاڭداردى جالعا ۇسىنادى. ال جالعا الۋشى ءوز كەزەگىندە «سۋدى قايدان الامىن، جارىق پەن گازدى شە» دەپ باس قاتىرىپ جاتپايدى، داپ-دايىن ورىنعا بارىپ، ءىسىن باستاپ كەتەدى.
جالعا الۋشىلار ءۇشىن تاعى ءبىر ۇلكەن مۇمكىندىك – سول شاعىن نىساندى كەيىنىرەك ءوزىنىڭ مەنشىگىنە ساتىپ الۋىنا بولادى. ول ءۇشىن ارنايى ونەركاسىپتىك يپوتەكا ىسكە قوسىلعان. بۇدان باسقا، جالعا الۋشىلار 70 ملن تەڭگەگە دەيىنگى سومادا 2%-بەن جانە سوماسى ارتىق بولسا 6%-بەن نەسيەنى پايدالانا الادى. نەسيەنى اينالىم قاراجاتىن تولىقتىرۋعا، كاسىبىنە قاجەتتى جابدىقتارىن، شيكىزات ساتىپ الۋعا پايدالانۋىنا بولادى.
ءسوزىمىزدىڭ باسىنا ايتىپ كەتكەن ەسىك جاسايتىن فابريكا ءدال وسى ءادىستى ۇتىمدى پايدالانىپ وتىر. جۇمىسىن 2021 جىلى باستاعان. الماتى يندۋستريالدى ايماعىنىڭ شاعىن ونەركاسىپتىك پاركىندەگى العاشقى قارلىعاش-كومپانيالاردىڭ بىرىنەن سانالادى. ءقازىر وندا 90 ادام جۇمىس ىستەپ جاتىر. قاراپايىم ەڭبەك ادامدارى ايىنا 30 ءتۇستى 40 ءتۇرلى مودەلى بار 10 مىڭعا دەيىن ەسىك شىعارادى.
اتالعان فابريكانىڭ شاعىن يندۋستريالدى پاركىندەگى سەحتى جالعا الۋ قۇنى – 1200 تگ/1 ش.م. جالداۋ ۋاقىتى 7 جىلعا بەلگىلەنگەن، ياعني وسى ۋاقىت ىشىندە قۇنى ديەۆالۆاسيا، ينفلياسيا نەمەسە باسقا دا سىرتقى فاكتورلارعا قاراماستان وسپەيدى. ال شاعىن سەح نەمەسە شەبەرحانا يەسى بۇل ۋاقىت ىشىندە تاعى العا قاراي جىلجۋ جوسپارىن جاساپ، دامي تۇسەدى.
وسىلايشا، شاعىن ونەركاسىپتىك پارك تە جەرگىلىكتى ءوندىرىستى دامىتۋعا جانە يمپورتتى الماستىرۋعا قاۋقارلى بولماق. جوبا «Almaty Business – 2025» قالالىق باعدارلاماسى شەڭبەرىندە جۇزەگە اسىرىلعان. بۇگىنگى كۇنى ءدال وسى تاجىريبە تەك الماتى قالاسىندا عانا كورىنىس تاۋىپ وتىر. ەندى قازاقستاننىڭ وزگە وڭىرلەرى دە زەرتتەپ، زەردەلەۋدە.
بۇگىندە الماتىدا بارلىعى 8 شاعىن ونەركاسىپ پاركى اشىلعان. تاعى 11ء-ى سالىنۋدا. وسىنداي وندىرىستىك ورىنداردى جالعا الۋ كەزەگىندە ءقازىردىڭ وزىندە 180-دەن استام كومپانيا تۇر. بۇل وتاندىق ءوندىرىستىڭ قارقىندى دامىپ كەلە جاتقانىن بىلدىرەدى.