قازاق كينوسىندا ىلگەرىلەۋ بار
«قازاقفيلم» كينوستۋدياسىنىڭ مالىمەتىنشە، «بارىمتاشىلار. ۋاقىت جولدارى» ءفيلمى فرانسيادا پروكاتقا شىعۋدا، دەپ حابارلايدى Almaty-akshamy.kz.
وتاندىق رەجيسسەر ەرلان نۇرمۇحامبەتوۆتىڭ جاپوندىق ارىپتەسى ليزا تاكەبامەن بىرلەسىپ تۇسىرگەن «بارىمتاشىلار. ۋاقىت جولدارى» ءفيلمى فرانسيادا پروكاتقا شىقتى. كينوتۋىندىنىڭ پروديۋسەرى يۋليا كيمنىڭ ايتۋىنشا، قازاقستان مەن جاپونيا بىرلەسىپ تۇسىرگەن كارتينا بۇگىننەن باستاپ فرانسيانىڭ 21 قالاسىندا كورسەتىلەدى. ايتا كەتسەك، وسىعان بايلانىستى بۇگىن پاريجدەگى Espace Saint Michel كينوتەاترىندا سانيتارلىق تالاپتارعا سايكەس ءفيلمنىڭ ارنايى كورسەتىلىمى وتەدى.
«وسى ءبىر جارىم جىل ىشىندە قانشاما توگىلگەن تەر، اتقارىلعان جۇمىس جاتىر. پاندەمياعا بايلانىستى فرانسياداعى تۇساۋكەسەر ءۇش مارتە كەيىنگە شەگەرىلدى. دەگەنمەن، قيىندىقتارعا قاراماستان، ءۇمىتىمىز ۇزىلمەدى. ءفيلمنىڭ ءتۇسىرۋ توبى مەن اكتەرلەرىمىزدى وسى قۋانىشپەن قۇتتىقتايمىن»، - دەپ جازدى پروديۋسەر ءوزىنىڭ Facebook-تەگى پاراقشاسىندا.
ايتا كەتەرلىگى، وندىرىسىنە «قازاقفيلم» جانە جاپوندىق Tokyo New Cinema كومپانياسى اتسالىسقان فيلمدە تىنىش ءومىرىنىڭ شىرقىن بۇزىپ، بارىمتاشىلار وتاعاسىن اياۋسىز ولتىرگەن وتباسى تۋرالى باياندالادى. مارقۇمنىڭ ولجاس ەسىمدى 12 جاسار بالاسى بارىمتاشىلاردىڭ قولىنان مەرت بولعان اكەسىنىڭ ولىمىنە قايعىرىپ، زۇلىمدىقپەن كۇرەسىپ، وتباسىلارىنا تۇسكەن اۋىرتپالىقتى قارىنداستارىمەن بىرگە كەشەدى. قورعانسىز قالعان ولجاستىڭ وتباسىنا عايىپتان پايدا بولعان بوگدە بىرەۋ قول ۇشىن سوزادى.
اتالعان فيلمدە باستى رولدەردى كانن كينوفەستيۆالىندە ۇزدىك اكتريسا اتانعان سامال ەسلياموۆا، تانىمال قازاقستاندىق اكتەر دۋلىعا اقمولدا جانە جاپوندىق اكتەر ميراي مورياما سومدايدى. اكەسىن جوعالتقان بالانىڭ ءرولىن ءمادي مينايداروۆ ەسىمدى جاس اكتەر وينايدى.
«جاپوندىقتارمەن بىرگە تۇسىرگەن فيلم الەم كينەماتوگرافىنىڭ وتانىندا كورسەتىلەتىنىنە قۋانىپ تا، قوبالجىپ تا وتىرمىن. مەنىڭ شىعارماشىلىعىمدا بۇل العاش رەت بولىپ جاتقان قۋانىشتى جاعداي»، - دەپ ويىمەن ءبولىستى ءفيلمنىڭ تەڭ رەجيسسەرى ەرلان نۇرمۇحامبەتوۆ.
سونداي-اق «بارىمتاشىلار. ۋاقىت جولدارى» ءفيلمى ەڭ العاش 2019 جىلى ازياداعى ەڭ ءىرى كينوفەستيۆالدەردىڭ ءبىرى – حالىقارالىق بۋسان كينوفەستيۆالى شەڭبەرىندە كورسەتىلگەن بولاتىن. قازاقستان مەن جاپونيا بىرلەسىپ تۇسىرگەن تۋىندى وڭتۇستىك كورەيانىڭ ەڭ ۇلكەن ەكرانى – Busan Cinema Center ورتالىعىندا اتالعان فەستيۆالدى اشقان ەدى.
وتكەن جىلى اتالعان فيلم توكيوداعى حالىقارالىق كينوفەستيۆال شەڭبەرىندە كورسەتىلىپ، جاپونيادا پروكاتقا شىققان بولاتىن.
قازاقستاندا «بارىمتاشىلار. ۋاقىت جولدارى» ءفيلمى ەلىمىزدە سانتيارلىق-ەپيدەميالىق احۋال جاقسارعان جاعدايدا اعىمداعى جىلدىڭ سوڭىنا دەيىن پروكاتقا شىعادى دەپ جوسپارلانىپ وتىر.