جىل باسىنان بەرى الەۋمەتتىك قىزمەتتەر پورتالى ارقىلى مۇگەدەكتىگى بار 16 مىڭنان استام ادام مەديسينالىق-الەۋمەتتىك كورسەتكىشتەر مەن قارسى كورسەتكىشتەرگە سايكەس ازىرلەنگەن وڭالتۋدىڭ جەكە باعدارلامالارى نەگىزىندە پروتەزدىك-ورتوپەديالىق كومەك قىزمەتىن الدى، دەپ حابارلايدى almaty-akshamy.kz قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
پورتال مۇگەدەكتىگى بار ادامدارعا ءوندىرۋشى مەن ءونىم بەرۋشىنى ءوز بەتىنشە تاڭداۋعا مۇمكىندىك بەرەدى. كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق سيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىستى جەتكىزۋ نەمەسە الىپ كەتۋ ارقىلى الۋعا بولادى. پورتالدا پروتەزدىك-ورتوپەديالىق قىزمەت كورسەتۋدەن باسقا سۋردوتەحنيكالىق، تيفلوتەحنيكالىق جانە گيگيەنالىق قۇرالدار، سونداي-اق كرەسلو-اربالار الۋعا ءوتىنىم راسىمدەۋگە بولادى.
اعىمداعى جىلدىڭ باسىنان بەرى الەۋمەتتىك قىزمەتتەر پورتالى ارقىلى مۇگەدەكتىگى بار 113 مىڭنان استام ادام وڭالتۋدىڭ تەحنيكالىق قۇرالدارىن، 6 مىڭنان استام – ىمداۋ ءتىلى قىزمەتىن، 31 مىڭنان استام – جەكە كومەكشىنىڭ قىزمەتىن الىپ، 36 مىڭعا جۋىق – ساناتورلىق-كۋرورتتىق جولدامامەن ەمدەلدى جانە 122 مىڭنان استام ادام كەپىلدىك بەرىلگەن الەۋمەتتىك توپتاماعا تاپسىرىستار راسىمدەدى.
«الەۋمەتتىك قىزمەتتەر پورتالى» اۆتوماتتاندىرىلعان اقپاراتتىق جۇيەسىن ەنگىزۋ مۇگەدەكتىگى بار ادامداردىڭ قۇقىعىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار شەڭبەرىندە قاراستىرىلعان. پورتالدى پايدالانۋ بويىنشا كەڭەستى قولداۋدىڭ بايلانىس ورتالىعىنان الۋعا بولادى، وعان ءتىلدى تاڭداپ جانە 4 ساندى باسىپ،1414 ءبىرىڭعاي ءنومىرى ارقىلى حابارلاسۋ كەرەك.