قازاقستاندىق عالىمدار مەديسينالىق قالدىقتاردى جويۋدىڭ يننوۆاسيالىق ءادىسىن ويلاپ تاپتى
وتاندىق پلازموحيميالىق رەاكتوردىڭ بالاماسى جوق. بىرەگەي قوندىرعى بيوماتەريالدى تەرميالىق زالالسىزداندىرۋعا مۇمكىندىك بەرەدى. ول ءۇشىن ەندى مەديسينالىق قالدىقتاردى سۇرىپتاۋدىڭ قاجەتى جوق، دەپ حابارلايدى Almaty-akshamy.kz
ەكى مىڭ گرادۋس تەمپەراتۋراعا دەيىن قىزعان پەشكە تۇسكەن كەز كەلگەن زات قاس-قاعىم ساتتە ەرىپ، ۋىتتى كومپونەنتتەردىڭ ىدىراۋىنا جول بەرىلمەيدى.
«ءبىزدىڭ تەحنولوگيانىڭ باستى ارتىقشىلىعى اسا جوعارى تەمپەراتۋرانىڭ قولدانىلۋىندا. جاڭا ءادىس بويىنشا رەاكتوردا مەديسينالىق قالدىقتار ادەتتەگىدەي وتقا جاعىلمايدى، گازداندىرۋ ارقىلى ىدىراتىلادى. ناتيجەسىندە تەك تازا ەكولوگيالىق گاز عانا پايدا بولادى. ياعني بەيتاراپتالعان گاز جانە تازا ەكولوگيالىق كۇل شىعادى. ءداستۇرلى تەحنولوگيادان باستى ايىرماشىلىعى وسى»، - دەيدى جوبا اۆتورى الەكساندر ۋستيمەنكو.
بۇگىندە ەلىمىزدە مەديسينالىق قالدىقتار ەكى ەسە تومەن تەمپەراتۋرادا جاعىلادى. «بۇل ۋلى كومپونەنتتەردىڭ تولىق جويىلۋىنا مۇمكىندىك بەرمەيدى»، – دەيدى عالىم. ينفەكسيالانعان جوعارى ۋىتتى مەديسينالىق قالدىقتار ادام دەنساۋلىعى ءۇشىن دە، قورشاعان ورتا ءۇشىن دە ءقاۋىپتى ەكەنى ءمالىم. سوندىقتان ولاردى زالالسىزداندىرۋدىڭ وزگە دە ءتيىمدى ادىستەرى قولدانىلىپ ءجۇر.
اۆتوكلاۆتاۋ، ياعني قالدىقتاردى بۋ، سۋ بۋى قىسىمىمەن وڭدەۋ بالامالى ادىستەرى بار. ول مەديسينالىق ۇيىمداردىڭ وزىندە جۇرگىزىلەدى. مۇنىڭ ناتيجەسىندە اتموسفەرالىق قىسىم ارقىلى مەديسينالىق قالدىقتاردىڭ قۇرامىنداعى زياندى ميكروورگانيزمدەر جويىلادى. سونداي-اق مەديسينالىق قالدىقتاردى حيميالىق ەرىتىندىلەرگە سالۋ نەمەسە قىسقاتولقىندى قوندىرعىلار ارقىلى زالالسىزداندىرۋعا بولادى. ولاردىڭ قاتارىنا كوپ ۇزاماي وتاندىق عالىمداردىڭ پلازمالىق وڭدەۋ ءادىسى قوسىلۋى ابدەن مۇمكىن.