ەلىمىزدە پايدالانىلمايتىن كولىك يەلەرىنە سالىق راقىمشىلىعىن جاساۋ ۇسىنىلدى

دەپۋتات جۇلدىز سۇلەيمەنوۆا قارجى مينيسترىنەن كولىك سالىعىنا قاتىستى تۋىنداعان ماسەلەنى سۇرادى.

- قارجى مينيسترلىگىنىڭ اقپاراتىنا سايكەس، 2020 جىلى «ە-Salyq-Azamat» قوسىمشاسى ەنگىزىلگەننەن باستاپ، 10 مىڭنان استام جەكە تۇلعا كولىك سالىعىن تۇزەتۋگە ءوتىنىش بەرگەن. وتىنىشتەر سالىق سوماسىن دۇرىس كورسەتپەۋ، سالىق سالۋ وبەكتىلەرى جوق ادامدارعا بەرەشەكتەرى جونىندە تالاپ قويۋ جانە باسقا دا سۇراقتاردى قامتىعان. بۇل رەتتە بولعان اقاۋلار تۋرالى سۇراعاندا ەكى مينيسترلىك (قارجى جانە ىشكى ىستەر مينيسترلىكتەرى) دەربەس نەگىزدە ەشقانداي قاتەلىكتەردىڭ جوق ەكەنىن ايتادى. مىسالى، ءىىم ءوز تاراپىنان بارلىق دەرەك ناقتى ءارى دۇرىس ەنگىزىلگەن دەپ كورسەتەدى. ال قارجى مينيسترلىگى ءوز ەسەپتەرىندە قاتەلىكتەر جوق ەكەنىن مالىمدەيدى. قازىرگى تاڭدا وسى ەكى مينيسترلىكتىڭ بىر-بىرىنە سالتەۋ ناتيجەسىندە كولىك سالىعى پروبلەماسى ورىندى شەشىلمەي وتىر. وسى رەتتە جىبەرىلگەن قاتەلىكتەردىڭ باستى سەبەبى نەدە؟ – دەپ سۇرادى دەپۋتات.

ءوز كەزەگىندە قارجى ءمينيسترى ەرۇلان جاماۋبايەۆ دەپۋتاتتىڭ سۇراعىنا جاۋاپ بەردى.

ەكى مينيسترلىك وسى باعىتتا اۋقىمدى جۇمىستاردى ىستەدى. سالىق سالۋشىلاردىڭ قاتىسۋىنسىز ملن-عا جۋىق اقپاراتتى تولىعىمەن وزەكتەندىردىك. ياعني بۇل جەردە قاتەلەر وتە كوپ كەتكەن. «ە-Salyq-Azamat» قوسىمشاسىنىڭ كومەگىمەن قوسىمشا قانداي پروبلەمالار بارىن ءبىلىپ وتىرمىز. بۇل جەردە حالىق تاراپىنان تۋىنداعان ماسەلە بار. اتاپ ايتقاندا، ادامدار اۆتوكولىكتى بىر-بىرىنە سەنىمحات ارقىلى ساتىپ جىبەرەدى، ءبىراق ءوزىنىڭ اتىنان شىعارمايدى. ودان بولەك، ۇرلانعان كولىكتەر بار جانە حالىقتىڭ ءبىرشاما كولىگى ميگراسيالىق پروسەستەرمەن باسقا مەملەكەتتەرگە كوشىپ، كولىگىن سەنىمحاتپەن ساتىپ كەتەدى. ءسويتىپ كولىكتى اتىنا اۋدارمايدى. وسىنداي پروبلەمالار بارىن مويىندايمىز، - دەپ ايتتى ۆەدومستۆو باسشىسى.

مينيستر جوعارىدا ايتىلعان كەمشىلىكتەر بويىنشا ىىم-مەن بىرلەسە جۇمىس جۇرگىزىلىپ جاتقانىن ايتتى.

- مىسالى، تاعى مىناداي ماسەلەلەر بار - قايتىس بولىپ كەتكەن، شەتەلگە كوشىپ كەتكەن ازاماتتار، 60-70 جىلدارى شىعارىلعان اۆتوكولىكتەر بار. ولار ءقازىر جۇرمەيدى نەمەسە جول اپاتىنا تۇسكەن جارامايتىن كولىكتەر، ودان بولەك، بولشەك ساۋداعا جىبەرىلگەن كولىكتەر دە بار. بۇل ماسەلەلەر بويىنشا ۇكىمەتكە وسىنداي كولىكتەرگە راقىمشىلىق جاساۋ بويىنشا ۇسىنىستار بەرىپ وتىرمىز. ويتكەنى، ولار ءبارىبىر تابىلمايدى، - دەپ جاۋاپ بەردى مينيستر ماجىلىستە.