وتاندىق ءفيلمنىڭ ۇتىس ويىنىنا قاتىسقان سارىاعاش تۇرعىنى لاس-ۆەگاسقا جولداما ۇتىپ الدى

 الماتىدا «ماشا مەن دۋداراي» ءفيلمىنىڭ كورەرمەندەرى اراسىندا ۇيىمداستىرىلعان «كينوتەاتردان - لاس-ۆەگاسقا!» اتتى ۇتىس ويىنى ءوز مارەسىنە جەتتى.

ويىن شارتى وتە جەڭىل بولدى. وعان Kinopark جانە Kinoplex جەلىلەرىنەن «ماشا مەن دۋداراي» ءفيلمىن كورىپ، كۋپون تولتىرعاندار قاتىستى، دەپ حابارلايدى Almaty-akshamy.kz "حابار" ارناسىنىڭ رەسمي سايتىنا سىلتەمە جاساپ. 

Tiger Films پروديۋسەرلىك كومپانياسى تۇسىرگەن «ماشا مەن دۋداراي» رومانتيكالىق حيكاياسى 10 اقپاندا پروكاتقا شىقتى. سول كۇنى باستالعان اكسيا 10 ناۋرىزعا دەيىن جالعاستى. ۇتىس ويىنىن وتكىزۋگە IBC group كومپانياسى قولداۋ كورسەتكەن.

ءىس-شارا الەۋمەتتىك جەلىدە تىكەلەي ەفيردە كورسەتىلدى. الەمدىك شوۋ-بيزنەستىڭ ورتالىعى لاس-ۆەگاسقا جولداما سارىاعاش قالاسىنىڭ تۇرعىنىنا بۇيىردى. 

كورەرمەننىڭ ىقىلاسىنا بولەنگەن «ماشا مەن دۋداراي» ءقازىر كورشى ەلدەردە كورسەتىلىپ جاتىر.

«بۇل - تاريحتا بولعان وقيعا. ورىس قىزى قازاق جىگىتكە عاشىق بولعان. ەرەكشە ماحاببات حيكاياسى. وسىنى ءبىز جاڭا لەپپەن، زاماناۋي تۇرعىدا تۇسىردىك»، - دەيدى اكتەر تاۋەكەل ءمۇسىلىم. 

«بۇل - مەنىڭ العاشقى ۇلكەن ءرولىم. فيلم ءقازىر قىرعىزستاندا كورسەتىلىپ جاتىر. ال 28 ساۋىردەن باستاپ ءازىربايجاندا كورسەتىلە باستايدى»، - دەيدى اكتريسا ماريا پەتليۋح.

رومانتيكالىق جانرداعى ءفيلمدى جۇڭگو كينوتەاترلارىندا كورسەتۋ جوسپاردا بار. سونداي-اق پروديۋسەرەلىك ورتالىق جاقىندا گەرمانيا كينوتەاترلارىمەن دە كەلىسسوزدى باستاماقشى.