دۋلات ديماشتى ءوز دوسىنداي كوردى.
ءانشى ديماش قۇدايبەرگەن ناۋقاس بالانىڭ ارمان-تىلەگىن ورىندادى، دەپ حابارلايدى Almaty-akshamy.kz Aikyn.kz سىلتەمە جاساپ.
ءبۇلدىرشىننىڭ ەڭ ۇلكەن ارمانى ديماشپەن كورىسۋ بولاتىن. بۇل جايىندا ءانشى ءوزىنىڭ Instagram پاراقشاسىندا جازعان.
جەتى جاسار بالانىڭ ەسىمى – دۋلات. ول ءقازىر دۋبايدا ەم قابىلداپ جاتىر.
«25 ناۋرىزدا دۋبايداعى كونسەرتتەن كەيىن جاڭا دوسىم دۋلاتپەن تانىستىم. ول ماعان ەڭ باستىسى – ءومىردى ءسۇيۋدى، ادامداردى جاقسى كورۋدى جانە قۋانىشىڭمەن ءبولىسۋدى ۇيرەتتى. دۋلات ءبارىن قورعاعىسى كەلەتىن پەرىشتە سياقتى. ويتكەنى بارىنە مەيىرلەنە، قۇراق ۇشىپ تۇرادى. جانىنداعى جانداردى قۇشاقتاپ، جىلىلىعىن ايامايدى. وسىنداي ەرەكشە بالاپانمەن تانىستىرعان «مەنىڭ ارمانىم» جوباسىنىڭ ۇيىمداستىرۋشىلارىنا راحمەت»، – دەدى ول.
ولاردىڭ كەزدەسۋىن «مەنىڭ ارمانىم» كورپوراتيۆتىك قورى ۇيىمداستىرعان.
قور وكىلى شولپان ارناۋتتىڭ ايتۋىنشا، دۋلات ديماشتى ءوز دوسىنداي كوردى. ول دۋبايدا وتكىزگەن ەكى كۇنىندە ءوزىن وتە باقىتتى سەزىندى. ۇيىمداستىرۋشىلار 25 ناۋرىزدا ديماشتىڭ كونسەرتى بولاتىنىن ەستىپ، ارنايى دۋبايعا ۇشىپ كەلگەن. ولاردىڭ باستى ماقساتى – اۋىر دەرتكە شالدىققان بالالاردىڭ ارمانىن ورىنداۋ. قوردىڭ جۇمىس ىستەپ جاتقانىنا ءبىر جىلدان استى. دۋلات - قوردىڭ قامقورلىعىمەن ارمانى ورىندالعان 100ء-شى بالا.
پوسموترەت ەتۋ پۋبليكاسيۋ ۆ Instagram