سامارقاندتا مەرەيتويلىق XV تاشكەنت حالىقارالىق «جىبەك جولىنىڭ ءىنجۋ-مارجانى» كينوفەستيۆالى اياقتالدى.
ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن دارحان تولەگەنوۆتىڭ «اعايىندى» جانە ءادىلحان ەرجانوۆتىڭ «ادەموكانى وقىتۋ» فيلمدەرى «ۇزدىك رەجيسسەر» جانە «قازىلار القاسىنىڭ ارنايى جۇلدەسى» نوميناسيالارىندا جۇلدەلى ورىندارعا يە بولدى، دەپ حابارلايدى Almaty-akshamy.kz.
فەستيۆالدە «اعايىندى» ءفيلمىنىڭ اتىنان قاتىسقان پروديۋسەر ماكسيم اكباروۆ «دالا» اتتى ءوزىنىڭ رەجيسسەرلىك ءفيلمى ءۇشىن «ۇزدىك دەبيۋت» نوميناسياسىندا جەڭىسكە جەتتى. جەڭىمپازعا سىيلىقتى اتاقتى امەريكالىق اكتەر، «وسكار» سىيلىعىنىڭ ەكى دۇركىن يەگەرى كيەۆين سپەيسيدىڭ ءوزى تابىس ەتتى.
ال فەستيۆالدىڭ باس جۇلدەسى «ۇزدىك فيلم» نوميناسياسىندا وزبەكستاندىق رەجيسسەر شوكير حوليكوۆتىڭ «جەكسەنبى» فيلمىنە بۇيىردى.
XV تاشكەنت حالىقارالىق كينوفەستيۆالى 29 قىركۇيەك پەن 2 قازان ارالىعىندا ءوتتى. وعان 52 ەلدەن 300-دەن استام كينوگەرلەر قاتىستى. كينوفەستيۆال اياسىندا كورەرمەندەر 60 كوركەم، دەرەكتى جانە قىسقامەتراجدى فيلمدەردى تاماشالاي الدى.
فەستيۆال قوناقتارى اراسىندا جوعارىدا اتالعان كيەۆين سپەيسيدەن باسقا فرانسۋز كينوسىنىڭ جۇلدىزدارى – «تاكسي» ءفيلمىنىڭ اكتەرلەرى فرەدەريك ديفەنتال مەن سامي ناسەري، اتاقتى پولياك رەجيسسەرى كشيشتوف زانۋسسي، سەرب رەجيسسەرى ەمير كۋستۋريسا جانە تاعى باسقالار بولدى.