ول ۆەلوسيپەدپەن 5 مىڭ شاقىرىم ءجۇرىپ وتكەن.
اۋەسقوي ۆەلوشاباندوز ساياحاتتى مىسىر جەرىنەن باستاپ، ساۋد ارابياسى مەن قاتارعا سوعىپ، بىرىككەن اراب امىرلىكتەرىنە جەتكەن. بۇل – ءداميردىڭ العاشقى ساياحاتى ەمەس. بۇعان دەيىن ول قازاقستاندى جاياۋ، وڭتۇستىك كورەيا مەن تۇركيانى ۆەلوسيپەدپەن بىرنەشە رەت ارالاعان، دەپ حابارلايدى Almaty-akshamy.kz 24.kz-كە سىلتەمە جاساپ.
ۇزاق جولدى ەڭسەرىپ ابۋ-دابيگە جەتكەن ۆەلوساياحاتشىنى ەلىمىزدىڭ بىرىككەن اراب امىرلىكتەرىندەگى ەلشىسى ماديار مەڭىلبەكوۆ ەرەكشە ىقىلاس بىلدىرە كۇتىپ الدى. بۇل – ساياحات ءجاي عانا ەلدى ارالاپ، ساياحات قۇرۋ ەمەس، ماقساتى، ناقتى ميسسياسى بار جولساپار. سوندىقتان ەلشى مىرزا امىرلىكتەگى ارىپتەستەرىنە وتانداسىمىزدىڭ جاساعان جورىقتارىن تانىستىرىپ، قولداۋ ءبىلدىردى. 27 اقپان كۇنى شارم-ەش-شەيحتان باستالعان جول ەگيپەتتىڭ استاناسى كايرگە جەتكىزدى. ودان سوڭ الەكساندريا مەن پورت سايد قالالارىنا بارعان. ەگيپەت ساپارىندا دىتتەگەنى – سۇلتان بەيبارىستىڭ 800 جىلدىعىنا وراي مىسىردى بيلەگەن قازاقتىڭ داڭقىن كوتەرۋ، ەسىمىن ۇلىقتاۋ.
«ەگيپەت ەلى سۇلتان بەيبارىستى قۇرمەتتەيدى. ەلدەن شىعاردا ونىڭ اتىنداعى مەشىتكە بارۋدى ماقسات ەتتىك. ودان كەيىن كايردە ۇلى ابايعا ورناتىلعان ەسكەرتكىشتى ءوز كوزىمىزبەن كورگىمىز كەلدى. الماتىدان شارم ەل شەيحكە ۇشىپ جەتتىك. ودان ءارى كايرعا ۆەلوسيپەدپەن جەتىپ الدىق. تاريحشىلارىمەن سويلەستىك. ولار سۇلتان بەيبارىستىڭ مىسىر ەلىنە قازاقتىڭ كيىز ءۇيىن تىككەنىن، وسىلايشا، ءوزى تۋعان دالانىڭ قۇندىلىقتارىن ۇستانىم ەتە وتىرىپ، مىسىر جەرىن دە كوتەرە بىلگەن تۇلعا رەتىندە تانىپ وتىر»، - دەيدى ۆەلوساياحاتشى دامير كوشەيەۆ.
دامير كوشەيەۆ بۇل جولعى ۆەلوساپاردى دوسى ورالحان تىنبايەۆپەن بىرگە باستاپتى. 2 وتانداسىمىز ەگيپەتتى اسىپ كەيىن ناۋرىز ايىندا ساۋد ارابياسىنا بارعان. بۇل جولى ۆەلوساپارداعى مارشرۋت – ەر-رياد-مەدينا-دجيددا-مەككا جانە تاعى دا ەر رياد قالاسى. قاسيەتتى مەككە قالاسىنداعى ال-حارام مەشىتىن ارالاعان. ودان ءارى جولعا دامير كوشەيەۆ ءوزى عانا اتتاندى. كاتار مەملەكەتىنە بارىپ، دوحا قالاسىنا اۋماعىن ءجۇرىپ وتكەن. اراعا كۇندەر سالىپ، ەكى دوڭگەلەكتى تەمىر تۇلپارىمەن اراب امىرلىكتەرىنە جەتتى. تاياۋ شىعىسقا جاساعان العاشقى ۆەلوجورىققا ساياحاتشى كۇننىڭ قاتتى ىستىق بولۋى اسەر ەتكەنىن ايتادى، ءبىراق كەدەرگى ەمەس. ونىڭ جوسپارى بويىنشا كەلەسى لوكاسيا – دۋباي قالاسى.
«قازاقستاندا ۇزاق قاشىقتىق بولعانىمەن، تابيعات الدەقايدا جۇمساق. سوسىن بىزدە اۋىلدار بار، جولايت از كەم دەمالىپ، سايا تابۋعا بولادى. مۇندا تراسسا بويىندا ورنالاسقان اۋىلدار جوق. ءبىراق جول، ينفراقۇرىلىم جاعدايى وتە جاقسى جانە حالقى – تىم قوناقجاي، مەيىرىمدى ادامدار. جولاۋشى ەكەنىمدى كورىپ، ايالداپ امانداسىپ، اس بەرىپ، سۋ اكەپ بەرىپ جاتتى. جوعارى ادامي قاسيەتتەرى مەن قۇندىلىقتارى ارقىلى كوتەرىپ جىبەردى، ءتىپتى جولدىڭ قيىندىعىن ۇمىتىپ كەتتىم. اراب الەمى كوركەم، سوعان كوز جەتكىزدىم»، - دەيدى ۆەلوساياحاتشى دامير كوشەيەۆ.
جولاۋشىمەن تانىسىپ، ءمان-جاي بىلىسكەندە دامير كوشەيەۆ ءوز وتانىن ماقتانىشپەن تانىستىراتىنىن بىزگە ول ەرەكشە كۇيمەن اڭگىمەلەپ بەردى، وتانعا دەگەن قۇرمەتى. ونىڭ ارمانى ناعىز ساياحاتشىنىكى – جەر شارىن اينالىپ، الەم كورۋ.