«KIOF» حالىقارالىق اڭشىلىق، بالىق اۋلاۋ جانە بەلسەندى دەمالىس كورمەسى 27–30 ءساۋىر ارالىعىندا «اتاكەنت» كورمە ورتالىعىندا، №9 پاۆيلوندا ءوتىپ جاتىر، دەپ حابارلايدى Almaty-akshamy.kz.
ءىس-شارانى الماتى قالاسى اكىمدىگىنىڭ قولداۋىمەن «قانسونار» اڭشىلاردىڭ قوعامدىق بىرلەستىكتەرى مەن اڭشىلىق شارۋاشىلىعى سۋبەكتىلەرىنىڭ رەسپۋبليكالىق قاۋىمداستىعى، ورمان شارۋاشىلىعى جانە جانۋارلار دۇنيەسى كوميتەتى، «كەرۋەنشىلەر» قاۋىمداستىعى جانە «Central Asia Trade Exhibition» جشس-سى ۇيىمداستىردى
«اڭشىلىق، بالىق اۋلاۋ جانە بەلسەندى دەمالىس كورمەسى قازاقستاندا 4-رەت ءوتىپ جاتىر. بيىل 50-دەن استام كومپانيا اڭ اۋلاۋ، بالىق اۋلاۋ جانە اشىق اۋادا دەمالۋدىڭ جاڭا ماۋسىمىنا ءوز تاۋارلارىن ۇسىنۋدا. كورمەدە تەك وتاندىق كومپانيالار ەمەس، رەسەي جانە جۇڭگو وكىلدەرى دە بار. بۇرىن تەك اڭشىلىق جانە بالىق اۋلاۋ كورمەسى بولسا، وسى جىل بەلسەندى دەمالىسقا بايلانىستى ونىمدەردى قوستىق. بۇل سالا ەلىمىزدە دامىپ كەلە جاتىر. كورمەگە بارلىق نيەت بىلدىرگەن ازاماتتار تىركەۋدەن ءوتىپ، قاتىسا الادى»، – دەدى شارا ۇيىمداستىرۋشىسى باۋىرجان وسپانوۆ.
ايتا كەتكەن ءجون، كورمەنىڭ ءار كۇنى پاۆيلون اۋماعىندا بالىق اۋلاۋ ىلمەگىن بايلاۋ، جورىق سومكەسىن دايىنداۋ، جابايى ۇيرەكتەردىڭ ءتۇرىن انىقتاۋ سەكىلدى قىزىقتى ويىن-ساۋىق شارالارى وتكىزىلدى.
– كورمەنىڭ باس ۇيىمداستىرۋشىسى – «قانسونار» اڭشىلاردىڭ قوعامدىق بىرلەستىگى. ونىڭ قۇرىلعانىنا 10 جىل بولدى. ءبىز اڭشىلاردى وقىتىپ، ولارعا كۋالىك بەرەمىز. اڭشىلاردىڭ سۋبەكتىلەرى بار، ءبىز سولاردى تىركەپ، جىل سايىن كۆوتا بەرەمىز. زوولوگيا ينستيتۋتىنىڭ زەرتتەۋىنە سۇيەنە وتىرىپ، قانشا اڭ اۋلاۋعا بولاتىنىن حابارلايمىز. قوعامدىق بىرلەستىگىمىز ەكولوگيا جانە تابيعي رەسۋرستار مينيسترلىگىمەن تىعىز بايلانىستا جۇمىس ىستەيدى»، – دەدى «قانسونار» قب باس ديرەكتورى مۇرات قابىلبەكوۆ.
