ساۋدا پلاتفورماسى ەلىمىزدە وتە قارقىندى دامۋدا.
ماسەلەن، پلاتفورمادا 2022 جىلدىڭ 9 ايىندا 6 749 قازاقستاندىق جەتكىزۋشى تىركەلگەن. قازاقستاندىق كاسىپكەرلەردىڭ تاۋارلارىن ساتۋ كولەمى 46،2 ملرد تەڭگەدەن استى، دەپ حابارلايدى Almaty-akshamy.kz.
ال قازاقستان اۋماعىنداعى Wildberriesء-تىڭ جالپى ساۋداسى 92،4 ملرد تەڭگەنى قۇرايدى. بۇل قازاقستانداعى ەلەكتروندىق ساۋدانىڭ جالپى كولەمىنىڭ 11،4%-ىنا تەڭ.
الداعى ۋاقىتتا كومپانيا باسشىلىعى قازاقستانننىڭ ءىرى قالالارىندا وزدەرىنىڭ تاۋار جينايتىن جانە ساقتايتىن قويمالارىن سالۋدى جوسپارلاپ وتىر. بۇل جونىندە كەشە پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارينمەن كەزدەسكەن Wildberries باس ديرەكتورى تاتيانا باكالچۋك حابارلادى.
ت. باكالچۋكتىڭ ايتۋىنشا، كومپانيانىڭ استانا جانە الماتىمەن قاتار، قازاقستاننىڭ باسقا وڭىرلەرىندە دامۋ بويىنشا ۇلكەن جوسپارلارى بار.
«ءبىز جەلىنى قازاقستاننىڭ ەڭ شالعاي وڭىرلەرىندە دامىتۋعا مۇددەلىمىز. ءقازىر Wildberries-تە ساتۋشى كوپ ەكەنىن كورىپ وتىرمىز، سونىڭ ىشىندە ءبىزدىڭ سايت ارقىلى ايەلدەر تاۋار ساتىپ، تابىس تابۋدا»، — دەدى ول.