ءبىلىم سايىسىنداعى جەتىستىكتەرى ءۇشىن وقۋشىلارعا بەرىلەتىن سىياقى مولشەرى قانداي؟
بيىل قازاقستان وقۋشىلارى حالىقارالىق پاندىك وليمپيادادا 2 التىن، 13 كۇمىس جانە 11 قولا مەدال جەڭىپ الدى. بۇل جايىندا ق ر ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2021 جىل قازاقستاندىق وقۋشىلار ءۇشىن ولجالى بولدى. بيىل شاكىرتتەر الەمدىك وليمپيادالاردا 31 مەدالدىڭ 26-ىن جەڭىپ الىپ، سوڭعى جىلدارداعى رەكوردتى جاڭارتتى. ءبىلىم الۋشىلار ەل قورجىنىنا 2 التىن، 13 كۇمىس جانە 11 قولا مەدال سالدى. بيىلعى قازاقستان حالقىنا جولداۋىندا مەملەكەت باسشىسى قاسىم-جومارت كەمەل ۇلى توقايەۆ دارىندى بالالاردى قولداۋ ءۇشىن شارالار ازىرلەۋدى تاپسىردى. بۇل مىندەتتى ىسكە اسىرۋ ءۇشىن مينيسترلىك زاڭناماعا تۇزەتۋلەر ازىرلەدى. ءقازىر زاڭ جوباسى ق ر پارلامەنتى ءماجىلىسىنىڭ قاراۋىنا ەنگىزىلدى»، - دەپ جازدى مينيستر Facebook پاراقشاسىندا.
ونىڭ اتاپ وتۋىنشە، تۇزەتۋلەر حالىقارالىق ءپان وليمپيادالارىنىڭ جۇلدەگەرلەرىنە جوعارى وقۋ ورىندارىنا ءۇبت-سىز، ياعني كونكۋرستان تىس نەگىزدە ءبىلىم الۋ ءۇشىن گرانتتار بەرۋدى، سونداي-اق وسى وليمپيادالاردىڭ جەڭىمپازدارى مەن جۇلدەگەرلەرى جانە ولاردى دايارلاعان پەداگوگ- جاتتىقتىرۋشىلارعا دا ءبىرجولعى اقشالاي سىياقى تولەۋدى كوزدەيدى.
«وقۋشىلاردى ىنتالاندىرۋ ءۇشىن التىن مەدال يەگەرلەرىنە — 1500 اەك، كۇمىس مەدال ءۇشىن – 1000 اەك، قولا مەدالعا – 500 اەك كولەمىندە اقشالاي سىياقى تاعايىنداۋ جوسپارلانىپ وتىر»، - دەدى اسحات ايماعامبەتوۆ.