بۇل بىلتىرعى جىلدىڭ وسى كەزەڭىمەن سالىستىرعاندا 20 پروسەنتكە كوپ
جاقىندا عانا «الماتى-قورعاس» تاس جولىندا ەڭ ءىرى جول اپاتى بولدى. 17 اۆتوموبيل بىر-بىرىنە سوعىلعان ەدى. وسىعان بايلانىستى وبلىستىق پد قىلمىستىق ءىس قوزعادى. كولىكتەردىڭ سوقتىعىسۋى «الماتى-وسكەمەن» اۆتوماگيسترالىندا دا جيىلەپ كەتتى.
تالدىقورعاننان ءۇشارالعا دەيىنگى ارالىقتا وسىنداي وننان اسا ءقاۋىپتى ايماق بار. جۇرگىزۋشىلەردىڭ كەيبىرى اسفالت توسەلگەن جول اياقتالىپ، اينالماعا بۇرىلاتىن جەردى بايقاماي تىكە ءوتىپ كەتەتىن كورىنەدى.
«ايىنا بىر-ەكى رەت جول كولىك وقيعاسى بولادى. وسى جەرگە شاقىرتۋمەن كەلەمىز. ءبارى وسى جىلدامدىقتى ساقتاماعاندىقتان بولادى. جول بەلگىلەرى تۇر»، - دەيدى پاترۋلدىك پوليسيا ينسپەكتورى باقتيار وتارشىنوۆ.
مۇنداعى جول بەلگىلەرى ۋاقىتشا قويىلعان. ويتكەنى اۆتوماگيسترال 2018 جىلدان بەرى قايتا سالىنىپ جاتىر. ءقازىر 300 شاقىرىمنان اساتىن جولدىڭ 280 كم پايدالانۋعا بەرىلگەن. سايكەسىنشە، كولىكتەر دە جۇيىتكىپ جۇرەتىن بولدى.
جول ساپاسى جاقسارعانىمەن ونىڭ قىسقى كۇتىمىنە بايلانىستى جۇك كولىگى جۇرگىزۋشىلەرىنىڭ ايتار ءۋاجى بار.
كولىك جۇرگىزۋشىلەرىنىڭ ايتۋىنشا، جولدىڭ جيەگىنە كولىكپەن شىعىپ توقتاي المايتىن كورىنەدى. جول كۇتىمىنە جاۋاپتىلاردىڭ جۇمىسىن ناشار دەپ باعالاپ وتىر. ويتكەنى جاڭبىر جاۋسا بىردەن مۇز قاتىپ، ءجۇرۋ قيىندايدى.
تالدىقورعان مەن ءۇشارال ارالىعىنداعى جول كۇتىمىنە قاتىستى پوليسەيلەر بىرنەشە رەت تەكسەرىس جۇرگىزگەن. ناتيجەسىندە جاۋاپتى مەكەمەلەرگە 50-دەن اسا ۇيعارىم بەرىلدى. وبلىس اۋماعىنداعى وزگە جولداردا دا ولقىلىقتار انىقتالعان.
«جولدى تەحنيكالىق باقىلاۋ ءبولىمىنىڭ قىزمەتكەرلەرى الماتى وبلىسىندا 2500 تەكسەرۋ جاسالىپ، ۇيعارىمدار بەرىلگەن. سول ۇيعارىمداردى ورىنداماعانى ءۇشىن 250 جول مەكەمەسىنىڭ نەمەسە اۋىلدىق، اۋداندىق اكىمشىلىك جازاعا تارتىلدى. سونىڭ ىشىندە «قازاۆتوجول» كومپانياسى بار»، - دەدى الماتى وبلىستىق پد ءاپب ءبولىم باسشىسى سەرىجان ءابجانوۆ.
بيىل وبلىس جولدارىندا 2044 كولىك سوقتىعىسىپ، 2900-دەن اسا ادام جاراقات الدى. 400-دەن اسا جولاۋشى قايتىس بولدى. قارا جولداعى قايعىلى جاعدايدى ازايتۋ ماقساتىندا كەلەسى جىلى وڭىردەگى اۆتوماگيسترالدارعا 300-دەن استام بەينەباقىلاۋ كامەرالارى ورناتىلادى.