ماماندار بولاشاقتا سپورت كەشەندەرىنىڭ سانى ارتاتىنىن ايتادى.
تۇركسىب اۋدانىنىڭ تۇرعىندارى ءۇشىن سپورت وبەكتىلەرىن «جاقىن ورنالاستىرۋ» جۇمىستارى جالعاسىپ جاتىر. بۇل تۋرالى الماتى اكىمى ەربولات دوسايەۆ اۋدان حالقىمەن وتكەن كەزدەسۋ بارىسىندا ايتتى، دەپ حابارلايدى Almaty-akshamy.kz.
«وسى جىلدىڭ ناۋرىز ايىندا «جۇلدىز» شاعىناۋدانىندا باسسەينى، گيمناستيكا، جەكپە-جەكپەن اينالىسۋعا ارنالعان زالدارى جانە ت.ب. بار جەكە دەنە شىنىقتىرۋ-ساۋىقتىرۋ كەشەنى اشىلدى. جىلدىڭ سوڭىنا دەيىن «جاس قانات» شاعىناۋدانىندا باسسەينى بار تاعى ءبىر سپورت كەشەنى ىسكە قوسىلادى»،- دەدى قالا اكىمى ەربولات دوسايەۆ.
سونىمەن قاتار اكىمنىڭ ايتۋىنشا، وسى جىلدىڭ قازان ايىندا مايلين كوشەسىندەگى «اۆياتور» ستاديونىنىڭ جانە وگاريەۆ كوشەسىندەگى دامۋ جانە شىعارماشىلىق ورتالىقتىڭ اۋماعىندا دەنە شىنىقتىرۋ-ساۋىقتىرۋ كەشەنىن سالۋ ءۇشىن جوبالاۋ-سمەتالىق قۇجاتتاماعا مەملەكەتتىك ساراپتاما قورىتىندىسىن الۋ جوسپارلانعان.