مەملەكەتتىڭ باس سانيتار دارىگەرى اشىق اۋادا ناماز وقۋعا رۇقسات بەرگەن.
وسى اپتادان باستاپ قازاقستاندا جۇما ناماز مەشىتتەر اۋلاسىندا وقىلادى. سانيتارلىق تالاپتار بويىنشا، ناماز اشىق اۋادا، الەۋمەتتىك قاشىقتىق ساقتالىپ، وقىلۋى ءتيىس، دەپ حابارلايدى Almaty-akshamy.kz.
«باس مەملەكەتتىك سانيتاريالىق دارىگەردىڭ «قازاقستان رەسپۋبليكاسىنىڭ حالقى اراسىندا كوروناۆيرۋستىق ينفەكسيا اۋرۋىنىڭ الدىن الۋ جونىندەگى شارالاردى ودان ءارى كۇشەيتۋ تۋرالى» 2021 جىلعى 2 قىركۇيەكتەگى №38 قاۋلىسىنا سايكەس وسى اپتادا ەلىمىزدىڭ بارلىق مەشىتتەرى اۋلاسىندا جۇما نامازىن وقۋعا رۇقسات بەرىلدى»، – دەلىنگەن قمدب-نىڭ رەسمي سايتىندا.
قمدب-عا قاراستى 19 وكىلدىكتىڭ بەسەۋىندە عانا جۇما نامازىن وقۋ ۋاقىتشا توقتاتىلعان بولاتىن. جاڭا قاۋلىعا سايكەس ەندى ەلىمىزدىڭ بارلىق وڭىرىندە جۇما نامازى مەشىت اۋلاسىندا وقىلادى.
باس مەملەكەتتىك سانيتاريالىق دارىگەردىڭ قاۋلىسىندا بۇل جايلى: «مەشىتتەر، پراۆوسلاۆيە شىركەۋلەرى جانە باسقا دا ءدىني وبەكتىلەر اۋماعىندا ۇجىمدىق ءدىني ءىس-شارالاردى (ونىڭ ىشىندە «جۇما نامازى»، كۇندەلىكتى پراۆوسلاۆيەلىك دۇعالار جانە باسقالارىن) اشىق اۋادا وتكىزۋ ماسكا رەجيمى مەن ءبىر ادامعا كەمىندە 4 مەتر ەسەبىنەن الەۋمەتتىك قاشىقتىق ساقتالعان كەزدە جۇزەگە اسىرىلادى» دەلىنگەن.
قاۋلىدا شەكتەۋ ءىس-شارالارىن، ونىڭ ىشىندە كارانتيندى ەنگىزۋ كەزەڭىندە ءدىني وبەكتىلەردەگى سانيتاريالىق-دەزينفەكسيالىق رەجيمگە قويىلاتىن تالاپتار دا كورسەتىلگەن. اتاپ ايتقاندا، مەشىتتەردە ءبىر رەت قولدانىلاتىن مەديسينالىق ماسكالاردىڭ جەتكىلىكتى قورىمەن، سونداي-اق قولدى وڭدەۋگە ارنالعان دەزينفەكسيالىق سۋلىقتارمەن، تەرى انتيسەپتيكتەرىمەن، دەزينفەكسيالاۋ قۇرالدارىمەن قامتاماسىز ەتۋدى ۇيىمداستىرۋ، ءدىني وبەكتىلەردە پەرسونال مەن ءدىني قىزمەتشىلەردىڭ ماسكالار كيۋىن قامتاماسىز ەتۋ مىندەتتەلگەن.
سونداي-اق عيبادات ۇيلەرىنە (قۇرىلىستارىنا) كىرۋگە مىندەتتى تۇردە ماسكا بولعان جاعدايدا رۇقسات ەتىلەدى. عيبادات ۇيلەرىندە ناماز وقۋ ءبىر ادامعا 4 مەتردەن كەم ەمەس ەسەپپەن قاشىقتىقتى ساقتاۋ كەزىندە جۇزەگە اسىرىلادى.