تەكەلىدە ءورت سوندىرۋشىلەر التى ادامدى امان الىپ قالدى

وقيعا ورنىنا الماتى وبلىسى تجد ءورت سىناق زەرتحاناسى جىبەرىلدى.

الماتى وبلىسىنىڭ تەكەلى قالاسىندا 4 قاباتتى كوپ پاتەرلى تۇرعىن ءۇيدىڭ بىرىندە ءورت شىقتى. تجد قىزمەتكەرلەرى ءبىر مەزگىلدە ءورتتى سوندىرە وتىرىپ، ازاماتتاردى قۇتقارۋ جانە ەۆاكۋاسيالاۋ جۇمىستارىن ۇيىمداستىردى، دەپ حابارلايدى Almaty-akshamy.kz قازاقپارات cىلتەمە جاساپ.

«6 ادام قۇتقارىلدى، ونىڭ ىشىندە 3 بالا، سونداي-اق 11 ادام، ونىڭ ىشىندە 4 بالا ەۆاكۋاسيالاندى. ءورت عيماراتتىڭ شاتىرىنا جانە كورشى پاتەرلەرگە تارالۋىنا جول بەرىلمەدى. ساعات 16.48-دە 16 شارشى مەتردى شارپىعان ءورت سوندىرىلگەن (3-قاباتتا، ەكى بولمەلى پاتەر ىشىندە جيھاز بەن زات جانعان). وقىس وقيعادان ەشكىم زارداپ شەكپەگەن»، - دەلىنگەن حابارلامادا.

ءورت تۋرالى حابارلاما الماتى وبلىسىنىڭ تجد-سىنا ساعات 16.10-دا كەلىپ تۇسكەن.

«جوعارى دارەجەلى شاقىرتۋ بويىنشا تەكەلى، تالدىقورعان قالالارىنىڭ جانە قارابۇلاق اۋىلىنىڭ ءورت ءسوندىرۋ بولىمشەلەرىنىڭ جاساقتارى دەرەۋ جىبەرىلدى. العاشقى ءورت ءسوندىرۋ بولىمشەلەرى شاقىرتۋ ورنىنا بەلگىلەنگەن نورماتيۆتىك ۋاقىتتا كەلدى. پاتەردىڭ تەرەزەسىنەن جالىن بايقالدى، سونداي-اق بارلاۋ بارىسىندا تۇرعىنداردى ەۆاكۋاسيالاۋ جولدارى قويۋ ءتۇتىن جانە ىستىق بولعانى انىقتالدى. ءورت كورشى پاتەرلەر مەن عيماراتتارعا ءقاۋىپ ءتوندىردى»، دەلىنگەن حابارلامادا.

ءقازىر ءورت قالاي شىققانى انىقتالىپ جاتىر. وقيعا ورنىنا الماتى وبلىسى تجد ءورت سىناق زەرتحاناسى جىبەرىلدى.

ءورتتى سوندىرۋگە الماتى وبلىسى تجد-نىڭ 11 قىزمەتكەرى مەن 4 تەحنيكاسى، «ءورت ءسوندىرۋشى» جشس-نىڭ 3 قىزمەتكەرى مەن 1 تەحنيكاسى، قالالىق پوليسيا ءبولىمىنىڭ 3 قىزمەتكەرى مەن 1 تەحنيكاسى جۇمىلدىرىلدى.