الماتى پەدياتريا ورتالىعىندا سۇيەكتىڭ قاتەرلى ىسىگىنە شالدىققان 100-دەن استام بالاعا كۇردەلى وتا جاسالدى
ەلىمىزدە جىل سايىن وستەوساركومامەن شامامەن 20-25 ءجاسوسپىرىم اۋىرادى. مامانداردىڭ ايتۋلارىنشا، بارلىق وستەوساركومانىڭ 50%-دان استامى تىزە بۋىنىنا، 30% يىق-بۋىنىنا جاقىن ورنالاسادى.
سوڭعى جىلدارى سۇيەك ىسىكتەرى كەزىندە جوعارى مولشەرلى حيميوتەراپيانى ەنگىزۋ ارقاسىندا باسقا ورگاندارعا مەتاستازدانۋدىڭ تومەندەۋى جانە ومىرشەڭدىك ارتتى. بۇل كوپتەگەن جاعدايلاردا 90%-دان استام زاقىمدانعان اياقتاردى ساقتاۋعا مۇمكىندىك بەردى. ياعني، وسى اتالعان پاتولوگياسى بار بالالارعا كەيبىر اسقىنعان جاعدايلاردى قوسپاعاندا، اياق-قولداردى ءىس جۇزىندە امپۋتاسيالامايدى.
وستەوساركومامەن ەمدەۋدىڭ جاڭا ادىستەرىن ەنگىزۋ تيىمدىلىكتىڭ الەمدىك ناتيجەلەرىنە جاقىنداۋعا مۇمكىندىك بەرەدى.
«پەدياتريا جانە بالالار حيرۋرگياسى عىلىمي ورتالىعىندا بالالار مەن جاسوسپىرىمدەردىڭ سۇيەك ساركوماسى كەزىندە ەندوپروتەزدەردى قولدانۋ ارقىلى اياق-قولداردى ساقتاپ قالۋ بويىنشا وتا جاساۋ 2012 جىلدان بەرى جۇرگىزىلەدى. ورتالىقتىڭ زاماناۋي مودۋلدىك ەندوپروتەزدەردى ساتىپ الۋ مۇمكىندىگىنىڭ جانە قارقىندى جوعارى مولشەرلى حيميوتەراپيانى قولدانۋدىڭ ارقاسىندا مۇشەساقتاۋشى وتالاردى جاساۋدىڭ مۇمكىندىگى ارتتى، سونداي-اق بالالارداعى وستەوساركومانى بىرىكتىرىپ ەمدەۋ ناتيجەلەرى دە جاقساردى. اتاپ ايتاتىن جايت، ونكولوگيالىق ەندوپروتەزدەر ورتوپەديالىق پروتەزدەرگە ۇقساس ەمەس، ەرەكشە مەگاپروتەزدەر بولىپ تابىلادى. قازىرگى تاڭدا حيرۋرگيالىق ەمدەۋدىڭ وسى ءتۇرى وستەوساركوماعا شالدىققان بالالاردىڭ 90%-دان استامىنا جاسالىنادى، ول ءوز كەزەگىندە بالانىڭ الەۋمەتتىك بەيىمدەلۋى مەن ونىڭ ءومىر ءسۇرۋ ساپاسىنىڭ جاقسارۋىنا مۇمكىندىك بەرەدى» - دەيدى اۋىر دا، بىرەگەي كۇردەلى وتانى جاسايتىن ونكوحيرۋرگ، پبحعو №2 حيرۋرگيي ءبولىمىنىڭ مەڭگەرۋشىسى، جوعارى ساناتتى دارىگەر ونكولوگ، ونكوورتوپەد باحرام جۇمادۋللايەۆ.
اياق-قولدى ساقتاي وتىرىپ ەمدەۋ اياقتالعاننان كەيىن جالپى ساۋىعىپ كەتۋ جاعدايلارى ەلىمىزدە 71%-دى قۇرايدى. بۇل ناتيجە وستەوساركومانى زەرتتەۋ جونىندەگى حالىقارالىق مۋلتيورتالىقتار ناتيجەسىنىڭ دەرەكتەرىمەن ساي كەلەدى.
سوڭعى جىلدارى بويى قىسقا كىشكەنتاي بالالارعا جەكە دايىندالعان از ءينۆازيۆتى ۇزارتقىش پروتەزدەردى قولدانۋ ارقىلى مۇشەلەردى ساقتاۋ وپەراسيالارى ەنگىزىلدى.
ونكولوگيا سالاسىنداعى ەڭ كۇردەلى وپەراسيا تەگىن مەديسينالىق كومەكتىڭ كەپىلدەندىرىلگەن كولەمى نەگىزىندە تەگىن جاسالادى. پەدياتريا جانە بالالار حيرۋرگياسى عىلىمي ورتالىعىندا اياققا عانا ەمەس، تىزە، يىق، جامباستىڭ قاتەرلى ىسىكتەرىنە دە ورگان ساقتاۋ وپەراسيالارى ورىندالادى. بىرەگەي وپەراسيالاردىڭ ناتيجەسىندە بالالاردىڭ اياق-قولدارى ساقتالىپ قانا قويماي، ولاردىڭ ءومىر ءسۇرۋ ساپاسى دا جاقساردى. بۇگىنگى كۇنى ولار وزدەرىنىڭ قۇربى-قۇرداستارىمەن قاتار دەڭگەيدە مەكتەپكە بارىپ، ۋنيۆەرسيتەتتە وقىپ، ءتۇرلى قىزمەتتە جۇمىس ىستەيدى. ءتىپتى، سپورتپەن اينالىسىپ، جاتتىعۋ زالدارىنا، باسسەيندەرگە بارىپ بەلسەندى ءومىر سۇرۋدە. ءتىپتى تۇرمىس قۇرىپ 2-3 بالانىڭ اناسى جانە اكەسى بولىپ جاتقان «بالالارىمىز» بار.
«وسى ناتيجەلەردىڭ ءبارى بىزگە، ەڭ ماڭىزدىسى - جاڭا ەمدەلىپ جاتقان ناۋقاستارعا ومىرگە دەگەن ۇلكەن قۇلشىنىس بەرەدى!»، – دەيدى ورتالىق ماماندارى.
ايتا كەتەيىك، رەسپۋبليكالىق پەدياتريا جانە بالالار حيرۋرگياسى عىلىمي ورتالىعىندا بالالارداعى وستەوساركومالار كەزىندە ءىرى بۋىنداردى ەندوپروتەزدەۋ بويىنشا بىرەگەي كۇردەلى وپەراسيالار 2012 جىلدان بەرى جاسالادى.
كەرەك دەرەك
وستەوساركوما – سۇيەكتىڭ سيرەك كەزدەسەتىن قاتەرلى ىسىگى. قاتەرلى دەرت كوبىنە 10 جاستان اسقان بالالاردا ءجيى كەزدەسەدى. عىلىمي ورتالىقتا 13 جىلدا 100-دەن استام بالاعا مەگا-ەندوپروتەزدەۋ وتالارى جاسالىندى، بۇل وتالار بالالاردىڭ اياق-قولدارىن ساقتاۋعا عانا مۇمكىندىك بەرمەي، تولىققاندى ءومىر سۇرۋگە ىقپال ەتتى.