بۇل بۇرىن-سوڭدى ەش جەردە جاريالانباعان قولجازبا.
قىركۇيەكتىڭ 23 كۇنى قازاقتىڭ باتىرى وسپان يسلام ۇلى تۋرالى قولجازبا ارحيۆكە تاپسىرىلعانى تۋرالى بەلگىلى بولدى، دەپ حابارلايدى Almaty-akshamy.kz Baq.kz سىلتەمە جاساپ.
قۇندى قولجازبانىڭ ارحيۆكە تاپسىرىلعانى جايىندا الماتىدا وتكەن كونفەرەنسيا بارىسىندا بەلگىلى بولدى. مادەنيەت جانە سپورت مينيسترلىگىنە قاراستى ورتالىق مەملەكەتتىك عىلىمي-تەحنيكالىق قۇجاتتاما ارحيۆىندە «قازاقتىڭ التىن اڭىزى – وسپان باتىر جانە نۇرعوجاي باتىردىڭ مۇراسى» اتتى حالىقارالىق عىلىمي-تاجىريبەلىك كونفەرەنسيا ءوتتى.
وسپان باتىر يسلام ۇلىنىڭ ەل مەن جەر ءۇشىن جاساعان جانقيارلىعى، قىتايدىڭ گومين جانە كوممۋنيستىك ۇكىمەتىمەن قان كەشىپ ءجۇرىپ ۇرىس سالعان ۇلت قاھارمانىنىڭ ساياسي ارەكەتى، سونداي-اق، نۇرعوجاي باتىردىڭ ەرلىكتەرى مەن مۇراسى كونفەرەنسيانىڭ باستى تاقىرىبى بولدى.
كونفەرەنسياداعى ەلەۋلى وقيعالاردىڭ ءبىرى ستامبۇل قالاسىنان ارنايى كەلگەن نۇرعوجاي باتىردىڭ نەمەرەسى ءباحادۇر حادجيحان مەن ميمار سينان كوركەم ونەر ۋنيۆەرسيتەتىنىڭ پروفەسسورى ءابدىۋاقاپ قارا وسپان باتىر تۋرالى نۇرعوجاي باتىردىڭ ءتۇپنۇسقا قولجازباسىن ارحيۆ قورىنا سىيعا تارتقانى بولدى. ايتا كەتەيىك، قولجازبا نۇرعوجاي باتىردىڭ ءوز قولىمەن توتە جازۋمەن جازىلعان ءارى بۇل بۇرىن-سوڭدى ەش جەردە جاريالانباعان.
«قازاقتىڭ حح عاسىرعا تاڭباسىن باسقان سوڭعى باتىرى، شىعىس تۇركىستاندا حالقىنىڭ ەگەمەندىگى مەن ازاتتىعى جولىندا كۇرەسكەن وسپان باتىر يسلام ۇلىنىڭ قازاق تاريحىندا الار ورنى وتە زور. امەريكالىق تاريحشى ليندا بەنسون «قازاقتىڭ التىن اڭىزى» دەپ اتاعان وسپان باتىر بۇكىل التاي جەرىن جانە شىعىس تۇركىستانداعى قازاقتاردى ەزىپ جانشىپ تۇرعان جۇڭگو گۋبەرناتورى شىڭ شى سايدان ازات ەتۋگە كۇش سالعان. وسى تۇستا ايتا كەتەيىك، كۇرەسكەر تۇلعانىڭ ءومىر جولىن جاڭا، تىڭ قىرلارىنان تانىتاتىن وسپان باتىردىڭ العاشقى سەگىز كوميسسارلارىنىڭ ءبىرى نۇرعوجاي باتىردىڭ ەستەلىكتەرى ۇلكەن تاريحي ماڭىزعا يە. ويتكەنى نۇرعوجاي باتىر وسپان باتىردىڭ جانىندا بولعان. سوندىقتان وسى ەكى الىپ تۇلعانى بىرگە ناسيحاتتاۋدى ماقسات ەتكەن بولاشاق ۇرپاقتى رۋحاني تۇرعىدان باي، ەلجاندى ەتىپ قالىپتاستىرۋعا ىقپال ەتەرى ءسوزسىز»، - دەيدى ورتالىق مەملەكەتتىك عىلىمي-تەحنيكالىق قۇجاتتاما ءارحيۆىنىڭ ديرەكتورى بايان جۇماتايەۆا.
ايتا كەتەيىك، اتالعان تاريحي قۇجات ارحيۆ قىزمەتكەرلەرىنىڭ تۇركياعا ءىسساپارى بارىسىندا «ارحيۆ – 2025» كەشەندى باعدارلاماسىن جۇزەگە اسىرۋ اياسىندا، قازاقستان تاريحىنا قاتىستى قۇجاتتار مەن ماتەريالداردىڭ كوشىرمەلەرىن، ءتۇپنۇسقالارىن انىقتاۋ بارىسىندا جۇزەگە اسىرىلىپ وتىر.