24 تامىزدا ت. ەسىمدى ازاماتشا بوستاندىق اۋداندىق پوليسيا باسقارماسىنا جۇگىندى. ونىڭ ايتۋىنشا، بەلگىسىز ادامدار كۇيەۋىنە تيەسىلى Toyota Land Cruiser 200 كولىگىن اۆتوتۇراقتان ۇرلاپ كەتكەن.
اتالعان دەرەك ق ر قك-نىڭ 188-بابى 4-بولىگىنە سايكەس سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
تەرگەۋ جانە ىزدەستىرۋ ءىس-شارالارىنىڭ بارىسى ىشكى ىستەر ءمينيسترى مەن الماتى پوليسيا دەپارتامەنتى باسشىلىعىنىڭ ەرەكشە باقىلاۋىنا الىندى.
«بۇل قىلمىستى اشۋ ماقساتىندا جەدەل تەرگەۋ توبى قۇرىلدى. جەدەل شارالاردىڭ ناتيجەسىندە قىلمىس اشىلدى. بۇرىندارى اۋىر قىلمىس جاساعانى ءۇشىن بىرنەشە رەت سوتتالعان، شىعىس قازاقستان وبلىسىنىڭ تۋماسى – 34 جاستاعى ت. ەسىمدى ازامات ۇستالدى. ونىڭ سىبايلاستارىمەن بىرگە قىلمىسقا تىڭعىلىقتى دايىندالعاندىعى انىقتالدى: ولار بىرنەشە كۇن بويى نازارلارىنا العان جول تالعامايتىن كولىكتىڭ ءجۇرۋ باعىتىن قاداعالاپ، ۇرلىق جاساۋعا قولايلى جەردى تاپقان. سوت سانكسياسىمەن كۇدىكتى قاماۋعا الىندى»، – دەدى الماتى قالالىق پد تەرگەۋ باسقارماسىنىڭ باستىعى مۇحامەدالى سەيسەن ۇلى.
سونىمەن قاتار، ۇرلانعان كولىكتى ساتىپ الۋشى دا انىقتالدى، وعان ت.ەسىمدى ازامات سالدەن سوڭ كولىكتىڭ نومىرلەرى مەن قۇجاتتارىن اكەلىپ بەرۋگە ۋادە بەردى. قاسكوي بۇل كولىكتى نارىقتاعى باعاسىنان ءۇش ەسە ارزانعا ساتىپ جىبەرگەن. ۇرلانعان كولىك وسكەمەن قالاسىنان تابىلدى.
«كولىك الماتىعا جەتكىزىلدى جانە يەسىنە تابىستالدى. قازىرگى ۋاقىتتا قىلمىستىڭ باسقا دا قاتىسۋشىلارىن انىقتاۋعا جانە ولاردى ودان ءارى ۇستاۋعا باعىتتالعان كەشەندى جەدەل ىزدەستىرۋ شارالارى جۇرگىزىلۋدە. سوتقا دەيىنگى تەرگەۋ جالعاسىپ جاتىر»، – دەدى سەيسەن ۇلى.