وسكەمەندە جەكە ۇيدە قازان جارىلىپ، 7 جاستاعى قىز اۋرۋحاناعا جەتكىزىلدى، دەپ حابارلايدى اqshamnews.kz ءتىلشىسى Yk.news-kz-كە سىلتەمە جاساپ.
شقو تجد مالىمەتىنشە، 28-شاعىن اۋدانداعى جەكە ۇيدە ۇزاق جاناتىن قازان جارىلعان. قۇرالدىڭ جارىلۋى سالدارىنان ءۇيدىڭ ىشكى بولمەارالىق قابىرعاسى زاقىمدانعان. وقيعا كەزىندە ۇيدە 2017 جىلى تۋعان ءبۇلدىرشىن بولعان.
قىز بالا انا مەن بالا ورتالىعىنا جەتكىزىلىپ، دارىگەرلەر تەكسەرۋ جۇرگىزگەن. وبلىستىق دەنساۋلىق ساقتاۋ باسقارماسىنىڭ حابارلاۋىنشا، قاراۋدان كەيىن بالانى ۇيىنە جىبەرگەن – دەنساۋلىعىنا تىكەلەي ءقاۋىپتى جاعداي انىقتالماعان.
وقيعا ورنىنا وسكەمەن اكىمى المات اقىشيەۆ تا باردى. ونىڭ ايتۋىنشا، توتەنشە جاعدايعا ەلەكتر جەلىلەرىندەگى اقاۋدان تۋىنداعان قازاننىڭ قىزىپ كەتۋى سەبەپ بولعان.
«وسى شاعىن اۋدانداعى ەلەكتر جەلىلەرىندەگى پروبلەمالاردى ون كۇن ىشىندە تولىق شەشۋدى تاپسىردىم. قازىرگى ۋاقىتتا وقيعا كەزىندە ۇيدە بولعان تۇرعىندار مەديسينالىق تەكسەرۋدەن ءوتىپ جاتىر. الدىن الا مالىمەت بويىنشا، ومىرىنە ءقاۋىپ جوق. جاعداي مەنىڭ باقىلاۋىمدا»، – دەدى قالا اكىمى.