اقتوبەدە تانىسىن "وتباسى بانك" ارقىلى جەڭىلدەتىلگەن باعدارلاما بويىنشا باسپانا الىپ بەرەمىن دەپ سەندىرىپ، ءىرى كولەمدە اقشا العان ايەلگە سوت ۇكىمى شىقتى، دەپ حابارلايدى اqshamnews.kz ءتىلشىسى «دياپازون» گازەتىنە سىلتەمە جاساپ.
بەلگىلى بولعانداي، الاياقتىق ارەكەتكە بارعان 39 جاستاعى ايەل كوپبالالى اناعا جەڭىلدىكپەن ءۇي الۋعا مۇمكىندىك بارىن ايتىپ، سوعان كوزىن جەتكىزگەن. جابىرلەنۋشى وعان باستاپقى جارنا رەتىندە 2 ميلليون تەڭگە اۋدارعان. الايدا ۋادە ەتىلگەن باسپانا بەرىلمەگەن سوڭ، ايەل پوليسياعا جۇگىنگەن.
تەرگەۋ بارىسىندا ايىپتالۋشىنىڭ تاعى ءبىر جابىرلەنۋشىدەن 3 ميلليون تەڭگە العانى انىقتالدى.
سوتتا كۇدىكتى ءوز كىناسىن تولىق مويىنداپ، «وتباسى بانككە» ەش قاتىسى جوعىن، جالعان ۋادە بەرگەنىن ايتتى. ونىڭ ايتۋىنشا، اقشانىڭ ءبىر بولىگىن قۇرىلىستىڭ باستاپقى كەزەڭىندە (كوتلوۆان ساتىسىندا) پاتەر ساتىپ الۋعا جۇمساماق بولعان، ءبىراق مامىلە جۇزەگە اسپاعان. كەيىن ول جابىرلەنۋشىلەردىڭ قاراجاتىن ءوز ەم-دومىنا شىعىن ەتكەنىن مويىندادى.
سوت ايىپتالۋشىنىڭ ەكى بالاسى بارىن جانە ءقازىر ءۇشىنشى بالاسىن كۇتىپ جۇرگەنىن ەسكەردى. امنيستيا نورمالارىن قولدانا وتىرىپ، ايەلگە 2 جىل 8 اي مەرزىمگە باس بوستاندىعىن شەكتەۋ جازاسى تاعايىندالدى. سونىمەن قاتار ول جابىرلەنۋشىلەرگە كەلتىرىلگەن 5 ميلليون تەڭگە ماتەريالدىق شىعىندى وتەۋگە مىندەتتەلدى.