جالپى سايلاۋشىلار سانى 11 ملن 953 مىڭ 465 ادامدى قۇرادى.
قازاقستاننىڭ ورتالىق سايلاۋ كوميسسياسى 22 قاراشادا پرەزيدەنت سايلاۋىنىڭ تۇپكىلىكتى قورىتىندىسىن جاريالادى، دەپ حابارلايدى Almaty-akshamy.kz.
وسك ءتوراعاسى نۇرلان ءابدىروۆتىڭ دەرەگىنشە، قاسىم-جومارت توقايەۆقا 6 ملن 456 مىڭ 392 سايلاۋشى نەمەسە ولاردىڭ 81،31%-ى داۋىس بەرگەن. «بارىنە قارسىمىن» باعانىن 460 484 نەمەسە 5،8% سايلاۋشى تاڭداعان.
سونىمەن بىرگە، جيگۋلي دايرابايەۆقا 271 641 نەمەسە 3،42 پايىز، قاراقات ابدەنگە 206 مىڭ نەمەسە 2،6 پايىز، مەيرام قاجىكەنگە 200 907 نەمەسە 2،53 پايىز، نۇرلان اۋەسبايەۆقا 176 116 نەمەسە 2،22 پايىز جانە سالتانات تۇرسىنبەكوۆاعا 168 731 نەمەسە 2،12 پايىز داۋىس بەرىلگەن.
ناقتىلانعان سايلاۋشىلار تىزىمدەرىنە ساي، جالپى سايلاۋشىلار سانى 11 ملن 953 مىڭ 465 ادامدى قۇرادى. ونىڭ 8 ملن 300 مىڭ 46 ادامى نەمەسە 69،44 پايىزى داۋىس بەرۋگە ارنالعان بيۋللەتەندەردى الدى. داۋىس بەرۋ كۇنى ق ر پرەزيدەنتتىگىنە كانديداتتاردىڭ 11 مىڭنان اسا سەنىم بىلدىرگەن ادامدارى، شەتەلدىك حالىقارالىق ۇيىمداردىڭ 641 بايقاۋشىسى، ساياسي پارتيالاردىڭ 15،5 مىڭنان اسا بايقاۋشىسى، قوعامدىق بىرلەستىكتەردەن 30 مىڭنان اسا بايقاۋشى سايلاۋ بارىسىن باقىلادى. سايلاۋ ۋچاسكەلەرىندە 1225 قازاقستاندىق ب ا ق وكىلدەرى، 23 ەلدىڭ 41 شەتەلدىك باق-تىڭ اككرەديتتەلگەن جۋرناليستەرى اقپارات تاراتتى.
ايتا كەتەيىك، 20 قاراشادا ەلىمىزدە كەزەكتەن تىس پرەزيدەنت سايلاۋ ءوتتى. بارلىق وڭىردە 10 033 ۋچاسكە جۇمىس ىستەدى. ال شەت مەملەكەتتەردەگى قازاقستان وكىلدىكتەرى جانىندا 68 ۋچاسكە قۇرىلعان.
ەلىمىزدەگى بۇكىل سايلاۋشىلاردىڭ 69 پايىزى نەمەسە 8 ملن 282 مىڭنان استام ادام ءوز تاڭداۋىن جاسادى.
«وسىلايشا، سايلاۋدىڭ كەشە جاريالانعان الدىن الا قورىتىندىلارى رەسمي كەلىپ تۇسكەن حاتتامالارمەن راستالدى. قر-داعى سايلاۋ تۋرالى كونستيتۋسيلىق زاڭنىڭ 9-بابى 1-تارماعىنا، 65-بابىنا سايكەس، داۋىس بەرۋگە قاتىسقان سايلاۋشىلاردىڭ 50 پايىزدان استامىنىڭ داۋىسىن العان كانديدات رەسپۋبليكا پرەزيدەنتى بولىپ سانالادى. وسىلايشا، 2022 جىلعى 20 قاراشاداعى كەزەكتەن تىس سايلاۋدا قاسىم-جومارت كەمەل ۇلى توقايەۆ ق ر پرەزيدەنتى بولىپ سايلاندى»، - دەدى نۇرلان ءابدىروۆ.