وسك «بايتاقتىڭ» پارتيالىق ءتىزىمىن تىركەدى

پارتيالىق تىزىمدە 18 ۇمىتكەر بار. 

وسك «بايتاق» پارتياسىنان ءماجىلىس سايلاۋىنا قاتىساتىن كانديداتتاردىڭ ءتىزىمىن تىركەدى، دەپ حابارلايدى Almaty-akshamy.kz

"بايتاق" جاسىلدار پارتياسى 18 ادامنان تۇراتىن پارتيالىق ءتىزىمدى ۇسىندى. ونىڭ ىشىندە 7 كانديدات – ايەلدەر، جاستار مەن مۇگەدەكتەر. بۇل تىزىمدەگى كانديداتتاردىڭ جالپى سانىنىڭ 38،9%-ىن قۇرايدى. وسك ۋاكىلەتتى مەملەكەتتىك ورگاندارمەن بىرلەسىپ، ءماجىلىس دەپۋتاتتارى بولىپ سايلانۋ ءۇشىن تىزىمگە ەنگىزىلگەن تۇلعالاردىڭ سايكەستىگىنە تەكسەرۋ جۇرگىزدى. پارتيالىق تىزىمدەگى بارلىق ادام كونستيتۋسيا مەن "سايلاۋ تۋرالى" كونستيتۋسيالىق زاڭنىڭ تالاپتارىنا سايكەس كەلەدى"، - دەدى ورتالىق سايلاۋ كوميسسياسىنىڭ مۇشەسى ءسابيلا مۇستافينا.

وسك مۇشەلەرى ءتيىستى قاۋلى قابىلدادى.

ءسابيلا مۇستافينا پارتيا تىزىمگە ەنگىزىلگەن ءاربىر كانديداتتىڭ سايلاۋ جارناسىن تولەيتىنىن اتاپ ءوتتى. ونىڭ مولشەرى – 1 ملن 50 مىڭ تەڭگە. پارلامەنت ءماجىلىسى دەپۋتاتتارىنىڭ الدىڭعى سايلاۋىندا داۋىس بەرۋشىلەردىڭ 5% جانە ودان دا كوپ داۋىسىن جيناعان ساياسي پارتيالار سايلاۋ جارناسىن تولەمەيدى.

"2021 جىلعى قاڭتاردا پارلامەنت ءماجىلىسى دەپۋتاتتارىنىڭ سايلاۋىنا "بايتاق" پارتياسى قاتىسپادى. سول سەبەپتى بۇل پارتيا پارتيالىق تىزىمگە ەنگىزىلگەن 18 ۇمىتكەر ءۇشىن 18 ملن 900 مىڭ تەڭگە كولەمىندە سايلاۋ جارناسىن تولەدى"، - دەپ قورىتىندىلادى سپيكەر.