ءماجىلىس پەن ءماسليحات سايلاۋى كەزىندە «BAQYLA» قوزعالىسى 3 مىڭعا جۋىق ۋچاسكەنى باقىلايدى.
«BAQYLA» قوعامدىق قوزعالىسى ەلىمىزدە 2023 جىلدىڭ 19 ناۋرىزىندا وتەتىن ق ر پارلامەنتى ءماجىلىسى مەن ماسليحاتتار سايلاۋىندا ەلىشىلىك تۇراقتىلىق پەن سايلاۋ پروسەدۋرالارىنىڭ قاتاڭ ساقتالۋىن قامتاماسىز ەتۋ ءۇشىن سايلاۋ ۋچاسكەلەرىن قامتيتىن وڭىرلىك شتابتاردا باقىلاۋشىلىق جاسايدى. بۇل تۋرالى قازاقستان باسپا ءسوز كلۋبىندا وتكەن بريفينگتە بەلگىلى بولدى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
اۋماقتىق باقىلاۋشىلار جەلىسى جۇمىسى الماتى قالاسىنداعى ورتالىق شتاب پەن ەلىمىزدىڭ 17 قالاسىندا ورنالاسقان وڭىرلىك شتابتار ارقىلى جۇرگىزىلەدى. ازاماتتىق سەكتور مەن ۇەۇ جەلىلەرىنەن باقىلاۋشىلار تارتۋ كوزدەلىپ وتىر ەكەن. باقىلاۋ جەلىلەرىنىڭ باسشىلارى مەن وڭىرلىك ۇيلەستىرۋشىلەرىنە سايلاۋ پروسەسىن باقىلاۋ تەورياسى مەن پراكتيكاسى بويىنشا ارنايى كۋرستار ۇيىمداستىرىلادى. وقىتۋ ZOOM كونفەرەنسياسى جانە وففلاين كەزدەسۋلەر ارقىلى جۇرگىزىلەدى.
«سايلاۋدى باقىلاۋ سايلاۋ ۋچاسكەسىندەگى ءبىر كۇندىك ارەكەتپەن شەكتەلمەيدى. ازاماتتار سايلاۋدى باقىلاۋعا قاتىسۋ ارقىلى ازاماتتىق-ساياسي كوزقاراسىن قالىپتاستىرادى، قازاق ەلىندەگى سايلاۋ جۇيەسىن وزگەرتۋگە دە ۇلەس قوسادى»، - دەدى ساياساتكەر، وقىتۋشى دوس كوشىم.
ايتا كەتەيىك، وقىتۋشىلار ءار وڭىردەن بىرنەشە ادامدى الماتى قالاسىندا وفلاين فورماتىندا دا وقىتادى. ارى قاراي ولار ءوز ايماعىندا باقىلاۋشى بولاتىن ازاماتتارعا ۇيرەتەدى. ءقازىر اتالعان قوزعالىس ارقىلى باقىلايتىن ۇكىمەتتىك ەمەس ۇيىمدار اتتەستاسيادان ءوتىپ جاتىر.
سايلاۋ كۇنى ورتالىق شتاب ەلىمىزدەگى سايلاۋ ۋچاسكەلەرىندەگى جاعدايدى بايانداپ، ساعات سايىن بريفينگتەر وتكىزەدى، وڭىرلەردەن ونلاين ترانسلياسيالار ۇيىمداستىرادى، الەۋمەتتىك جەلىلەردە پوستتار مەن بەينەجازبالاردى جاريالايدى جانە تيراجدايدى، جالعان اقپاراتتاردى انىقتايدى، ەرەكشە جاعدايلارعا تۇسىنىكتەمە بەرەدى.