«اقجول» قدپ 54 ادامنان تۇراتىن پارتيالىق ءتىزىم ۇسىندى.
ورتالىق سايلاۋ كوميسسياسىنىڭ وتىرىسىندا ق ر پارلامەنتى ءماجىلىسى دەپۋتاتتارىنىڭ سايلاۋىنا «اقجول» دەموكراتيالىق پارتياسىنان كانديداتتاردىڭ پارتيالىق ءتىزىمىن تىركەۋ تۋرالى قاۋلى قابىلداندى، دەپ حابارلايدى Almaty-akshamy.kz
ورتالىق سايلاۋ كوميسسياسىنىڭ مالىمەتىنشە، 6 اقپاندا "قازاقستاننىڭ "اقجول" دەموكراتيالىق پارتياسى" قوعامدىق بىرلەستىگى پارتيالىق ءتىزىمدى ۇسىنۋ تۋرالى قۇجاتتاردى تاپسىردى. وسك "اقجول" دەموكراتيالىق پارتياسى ۇسىنعان كانديداتتاردىڭ كونستيتۋسيا مەن "قازاقستان رەسپۋبليكاسىنداعى سايلاۋ تۋرالى" كونستيتۋسيالىق زاڭ تالاپتارىنا سايكەستىگىن انىقتاۋ بويىنشا قاجەت راسىمدەردى جۇرگىزدى.
وسك مۇشەسى اسىلبەك سماعۇلوۆ تىركەۋگە ءبىر ساياسي پارتيادان ءبىر عانا ءتىزىم رۇقسات ەتىلگەنىن اتاپ ءوتتى. پارتيالىق تىزىمدە ءۇش سانات وكىلدەردىڭ سانى (ايەلدەر، 29 جاسقا تولماعاندار جانە مۇگەدەكتىگى بار ادامدار) 30 پايىزدان كەم بولماۋعا ءتيىس.
"اقجول" قدپ 54 ادامنان تۇراتىن پارتيالىق ءتىزىم ۇسىندى. تىزىمگە 18 ايەل، جاستار وكىلدەرى جانە مۇگەدەكتىگى بار ادامدار كىرگەن، بۇل تىزىمگە ەنگىزىلگەن جالپى ساننىڭ 33،3%-ىنا تەڭ. وسك ۋاكىلەتتى مەملەكەتتىك ورگاندارمەن بىرلەسىپ، ءماجىلىس دەپۋتاتى بولىپ سايلاۋ ءۇشىن تىزىمگە ەنگىزىلگەن ادامداردىڭ سايكەستىگىن تەكسەردى. تىزىمگە ەنگەن بارلىق تۇلعا كونستيتۋسيانىڭ جانە سايلاۋ تۋرالى كونستيتۋسيالىق زاڭنىڭ تالاپتارىنا سايكەس كەلەدى»، - دەدى اسىلبەك سماعۇلوۆ.
وسك حابارلاعانداي، پارتيالىق ءتىزىم ۇسىنعان ساياسي پارتيالار پارتيالىق تىزىمگە ەنگىزىلگەن ءاربىر ادام ءۇشىن پارتيا قاراجاتىنان وسك شوتىنا ەڭ تومەنگى جالاقىنىڭ 15 ەسەلەنگەن مولشەرىندە (1 050 000 تەڭگە) سايلاۋ جارناسىن ەنگىزۋى كەرەك. بۇل رەتتە پارلامەنت ءماجىلىسى دەپۋتاتتارىنىڭ بۇرىنعى سايلاۋىندا 5% جانە ودان دا كوپ داۋىس العان پارتيالار سايلاۋ جارناسىن تولەمەيدى.
«2021 جىلعى قاڭتاردا وتكەن ءماجىلىس دەپۋتاتتارىن سايلاۋدا "اقجول" دەموكراتيالىق پارتياسى 10،9% داۋىس جينادى، وسىلايشا "اقجول" پارتياسى سايلاۋ جارناسىن تولەۋدەن بوساتىلدى»، - دەدى وسك مۇشەسى اسىلبەك سماعۇلوۆ.