تۇركياعا كومەك: قازاقستاندىق ەرىكتىلەر كاحرامانماراش قالاسىنا 100 قازاق ءۇي تىگىپ جاتىر. ولاردىڭ 23ء-ى – 12-16 قاناتتى سالتاناتتى اعاش ءۇي بولسا، قالعانى تەمىردەن جاسالعان.
تۇركياداعى جەر سىلكىنىسىنە بايلانىستى قازاقستاننان بارعان ەرىكتىلەر 100 قازاق ءۇيدى قاتتى زارداپ شەككەن كاحرامانماراش قالاسىنا تىگىپ جاتىر. تۇركيا بيلىگى ول ۇيلەرگە باسپاناسىز قالعان ادامداردى ورنالاستىرىپ، جاقىندارىنان ايىرىلعان جاندارعا پسيحولوگيالىق كومەك كورسەتپەك، دەپ حابارلايدى Almaty-akshamy.kz. Azattyq Ruhy-كە سىلتەمە جاساپ.
العاشقى وتىز ءۇيدى 14 ەرىكتى قازاق جىگىتى «Kilavuzlu mesire alani» ۇلتتىق پاركىنە تىگە باستادى. ەتنواۋىل رەتىندە ۇيلەر تولىق تىگىلگەن سوڭ، قازاقستان حالقىنىڭ اتىنان قامكوڭىل تۇرىك اعايىنعا اس بەرىلەدى. 30 قازاق ءۇي تىكەلەي تۇركيا بيلىگىنىڭ ارنايى ۇشاعىمەن جەتكىزىلدى. قازاق حالقى جيناعان قارجىعا ءارتۇرلى ساناتتاعى ۇيلەر ساتىپ الىندى. بۇكىلالەمدىك ەتنوسپورت قاۋىمداستىعىنىڭ وتىنىشىمەن تۇركيا بيلىگى شىعارعان ارنايى ۇشاق قالعان ۇيلەردى بۇگىن الماتىدان ىستامبۇلعا جەتكىزەدى. ارى قاراي ادانا قالاسى ارقىلى كولىكپەن كاحرمانماراشقا كەلەدى. ولاردىڭ 23ء-ى – 12-16 قاناتتى سالتاناتتى اعاش ءۇي بولسا، قالعانى تەمىردەن جاسالعان.
«جالپى سانى جۇزگە جۋىق كيىز ءۇي تىگىلەدى. بارلىعىندا قاجەتتى كىلەم، وزگە دە جابدىقتارى تولىق الىنعان، جەتكىلىكتى. قالعانى – تەمىردەن جاسالعان سۇيەكتى ۇيلەر. تەمىرگە بەكەر تاڭداۋىمىز تۇسكەن جوق. بىرىنشىدەن، ارزان. ەكىنشىدەن، قۇرالۋى تەز، 15 مينۋتتا 3-4 ادام قۇرايدى، بايلاپ وتىرمايسىڭ. ۇشىنشىدەن، ارمەنياعا كيىز ءۇي جىبەرگەندە، ول جاقتاعىلار قازاقى ءۇيدىڭ نە ەكەنىن بىلمەگەن جۇرت كيىزىن، ۋىعىن ورتەگەن. بۇل كوڭىلگە دە، جۇرەككە دە اۋىر تيەدى ەكەن. ال تەمىرمەن ونداي نارسە جاساي المايسىڭ. وسىنداي سەبەپتەرگە بايلانىستى كيىز ءۇيدىڭ تەمىر سۇيەكتىسىن تاڭدادىق»، - دەدى قايىرىمدىلىق ءىس-شاراسىن ۇيىمداستىرۋشى نۇربەك بەكباۋ.
ونىڭ ايتۋىنشا، تۇركياعا كيىز ۇيمەن بىرگە جىلىتۋ پەشتەرى دە جەتكىزىلىپ جاتىر. قازاق ۇيلەر پالاتكاعا قاراعاندا جىلى، كەڭ ءارى كوڭىلى مۇڭدى، قايعىلى جاندار ءوزىن باسپانادا تۇرعانداي سەزىنە الادى.
«ءبىز كەشە كەلىپ جەتتىك. سىناپ كورۋ ءۇشىن ءوزىمىز ىشىندە ۇيىقتادىق. ارينە، سۋىقتاۋ. ءبىراق ءبىزدىڭ جۇكپەن بىرگە ارنايى 61 دانا جىلىتۋ قۇرىلعىسى كەلە جاتىر. سولار ارقىلى ءۇيدى جىلىتامىز. تۇرىكتەردىڭ وزدەرى دە «پالاتكالار سۋىق، جىلىنبايدى» دەپ جازىپ جاتىر. سونىڭ كەسىرىنەن ادامدار اۋىرىپ قالىپ جاتىر ەكەن. كيىز ءۇي تىگۋگە ەلىمىزدەن 14 ادام كەلدى. ءبارى شەتىنەن تاڭداپ الىندى. تيمۋر سىپاتايەۆ سياقتى بۇرىن اسكەري سالادا قىزمەت ەتكەن ادامدار، سونىڭ ىشىندە ءوزىن ءومىر بويى كيىز ءۇي تىگۋگە ارناعان اتامىز بار. قىسقاشا ايتقاندا، سايدىڭ تاسىنداي ىرىكتەلگەن ادامدار كەلدى»، - دەيدى ول.
بۇل باستامانى كوپتەگەن قازاقستاندىقتار قولدادى. مەملەكەتتەن ەشقانداي قارجى بولىنبەگەن. جەتكىزۋ جاعىن تىكەلەي تۇركيا جاعى مويىندارىنا العان. قازاق حالقى 20 ملن تەڭگەدەن استام قاراجات جينادى. 17 ملن 300 مىڭ تەڭگەگە 45 كيىز ءۇي الىنعان. كەيىن تاعى 2 ملن 700 مىڭ تەڭگەگە تۇرمىستىق زاتتار الىندى. ودان بولەك، وتاندىق كاسىپكەرلەر 50 كيىز ءۇي ساتىپ الىپ، اۋەجايدىڭ قويماسىنا جەتكىزدى.
«تۇرىك ەلىنە كومەككە كەلدىم. جاسىم 60-تان اسسا دا، الماتىدا تىنىش وتىرا المادىم. كومەگىمىزدى سوڭىنا دەيىن بەرەمىز. قۇداي مۇنداي اۋىر جاعدايدى باسقا بەرمەسىن. قيراعان ۇيلەردى كورىپ جۇرەك اۋىردى. جىلاعان انا، ەگىلگەن اكە، ەڭىرەگەن بالا. وتە قورقىنىشتى، قيىن، اۋىر جاعدايدى كوردىم. ءبىزدىڭ نيەتىمىز – تۇركيالىق اعايىنعا دەمەۋ بەرۋ، باۋىرمالدىعىمىزدى كورسەتۋ، تۋىسقان حالىق ەكەندىگىمىزدى ءبىلدىرۋ»، - بەرەگەن سىپاتايەۆ.
قازاق ۇيلەر كەيىن وسىندا ءبىرجولا قالادى. ەتنواۋىلدا الداعى كۇندەرى كاحرامانماراش قالاسىنىڭ تۇرعىندارىنا تۇراقتى اس بەرىلەدى. ءزىلزالادان زارداپ شەككەن ايەلدەر مەن بالالار ءقازىردىڭ وزىندە تىگىلىپ جاتقان قازاق ۇيلەردى اينالشاقتاپ، قونىستاناتىن ءساتتى كۇتىپ ءجۇر.
«وتە اۋىر، ايتىپ جەتكىزۋ قيىن تراگەديا. ولار ءبىزدىڭ ۇيلەردە تۇرىپ، قازاق ەلىنىڭ جىلۋلىعىن سەزىنسىن، شارشاعانىن باسسىن، ءقاۋىپسىز ءومىر ءسۇرسىن. قازاق ءۇي جەر سىلكىنىسى كەزىندە قۇلامايدى، ءقاۋىپسىز. شاڭىراق پەن ۋىق سياقتى قازاق-تۇرىك ەلى ءبىر، بىرلىكتەمىز. تاتۋلىعىمىز تۇراقتى. وسىنداي يدەيالارىمىزدى دا ايتىپ جاتىرمىز. ولار بىزگە كومەكتەسۋ ارقىلى ءۇي تىگۋدى دە ۇيرەنىپ جاتىر»، - دەدى الماتىدان كەلگەن ەرىكتى جارقىنبەك احمەتساكي ۇلى.