ەنەرگەتيكا مينيسترلىگى 6 وبلىستى جارىقسىز قالدىرعان جەلىدە جوندەۋ جۇمىستارى اياقتالعانىن مالىمدەدى
«اۆاريالىق جۇمىستار اياقتالعان سوڭ ساعات 16:45-تە ەكىباستۇز-اعادىر ءاج-500 كۆ ل-5170 ستانساسى ىسكە قوسىلدى. اجىراتۋدىڭ سەبەبى - ۆ فازاسىنىڭ №1111 تىرەگىندە گيرلياند ءۇزىلىپ قالعان»، - دەلىنگەن حابارلامادا.
ەسكە سالا كەتەيىك، بۇگىن تاڭەرتەڭ تەحنولوگيالىق قورعانىس ارەكەتىنەن ل-5170 ەكىباستۇز-اقادىر 500 كۆ ەلەكتر جەلىسىندە اپات بولعانىن حابارلاعان ەدىك.
سونىڭ سالدارىنان الماتى، جامبىل، جەتىسۋ، تۇركىستان، قىزىلوردا، قاراعاندى وبلىستارىندا 600 مۆت، شامامەن تۇتىنۋشىلاردىڭ 10% جارىقسىز قالعان.
«KEGOC» اق ەلەكتر جەلىلەرىنىڭ اپاتقا قارسى اۆتوماتيكاسى شتاتتىق رەجيمدە جۇمىس ىستەپ، سونىڭ ارقاسىندا قازاقستاننىڭ وڭتۇستىگى مەن ورتالىق وڭىرىندە تۇتىنۋشىلاردىڭ تولىقتاي جارىقسىز قالۋىنىڭ الدىن العان.
«ەلەكتر بەرۋ جەلىسىندەگى زاقىمدانعان تۇستى انىقتاۋ جانە جويۋ ءۇشىن جوندەۋ بريگادالارى بارعان»، - دەلىنگەن حابارلامادا.