اباي وبلىسىندا ورتەنگەن اعاشتى وڭدەيتىن زاۋىت سالىنادى.
بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتتى، دەپ حابارلايدى Almaty-akshamy.kz
ۆەدومستۆو باسشىسى وڭىردە بولعان ورمان ءورتىنىڭ سالدارىن جويۋ بويىنشا قانداي جۇمىستار اتقارىلعانىنا توقتالدى.
بىرىنشىدەن، 2023 جىلعى قازاندا مينيسترلىك جەدەل شتاب قۇردى. ونىڭ قۇرامىنا ورمان شارۋاشىلىعى جانە جانۋارلار دۇنيەسى اۋماقتىق ينسپەكسيانىڭ وكىلدەرى، «سەمەي ورمانى» رەزەرۆاتىنىڭ ماماندارى، اباي وبلىسىنىڭ اكىمدىگى مەن قۇقىق قورعاۋ ورگاندارىنىڭ وكىلدەرى كىردى.
ەكىنشىدەن، ءتيىستى جول كارتاسى بەكىتىلدى. ءورت شالعان ەكپەلەرگە قاتىستى ورمان ماماندارى جۇرگىزگەن زەرتتەۋلەردىڭ ناتيجەسى بويىنشا اعاش زيانكەستەرى مەن اۋرۋلارى بايقالعان. وسىعان بايلانىستى ورمان زيانكەستەرىنىڭ تارالۋىنا جول بەرمەۋ جانە اعاشتى ساقتاۋ ءۇشىن بۇلىنگەن سۇرەكتى جيناپ الۋدى بارىنشا قىسقا مەرزىمدە ىسكە اسىرۋ قاجەت، - دەدى ەرلان نىسانبايەۆ ماجىلىستەگى ۇكىمەت ساعاتىندا.
الدىن الا دەرەكتەر بويىنشا، اباي وبلىسىندا ورمانداعى ورتتەن شامامەن 6 ملن تەكشە مەتر اعاش جانىپ كەتكەن. رەزەرۆاتتا بار تەحنيكا مەن جابدىقتار، ادام كۇشى وسىنداي كولەمدەگى جۇمىستى ىستەۋگە ەسەپتەلمەگەن. سوندىقتان ارنايى تەحنيكا مەن جابدىقتاردى ساتىپ الۋ كەرەك.
«ورتەنگەن ورمان اعاشتارىنىڭ جالپى كولەمىنىڭ شامامەن 80 پايىزى – وتىندىق اعاش. سوندىقتان بۇل ايماقتا اعاشتى تەرەڭدەتىپ وڭدەۋ زاۋىتىن سالۋ كەرەك. بۇل رەتتە، مينيسترلىك اباي وبلىسىنىڭ اكىمدىگىمەن بىرلەسىپ، ورمان ورتىنەن بۇلىنگەن سۇرەكتى تەرەڭدەتىپ وڭدەۋ زاۋىتىن سالۋ ءۇشىن ينۆەستورلاردى تارتۋ ماسەلەسىن پىسىقتاپ جاتىر. ءقازىر 4 كومپانيا وسىعان مۇددەلى»، - دەدى مينيستر.