دەپۋتات ۆ.ي. توحتاسۋنوۆتىڭ وكىلەتتىگىن مەرزىمىنەن بۇرىن توقتاتۋ تۋرالى ۇسىنىم قازاقستان رەسپۋبليكاسى پارلامەنتىنىڭ ماجىلىسىنە ەنگىزىلدى
2022 جىلعى 12 ناۋرىزدا نۇرلان ءابدىروۆتىڭ توراعالىعىمەن بەينەكونفەرەنسيا بايلانىسى رەجيمى ارقىلى قازاقستان رەسپۋبليكاسى ورتالىق سايلاۋ كوميسسياسىنىڭ وتىرىسى ءوتتى، دەپ حابارلايدى Almaty-akshamy.kz وسك-نىڭ باسپا ءسوز قىزمەتىنە سىلتەمە جاساپ.
ورتسايلاۋكوم ءتوراعاسى نۇرلان ءابدىروۆ، سونداي-اق وسك مۇشەلەرى ءسابيلا مۇستافينا جانە شاۆحات وتەمىسوۆ وتىرىسقا اقمولا وبلىسىنداعى ءىس-ساپار بارىسىندا قاتىستى.
«وتىرىستا ورتسايلاۋكوم مۇشەلەرى «قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ۆلاديمير يمتاحۋنوۆيچ توحتاسۋنوۆتىڭ وكىلەتتىگىن توقتاتۋعا اكەلەتىن نەگىزدىڭ تۋىنداعانى تۋرالى» قاۋلى قابىلدادى»،-دەلىنگەن حابارلامادا.
كونستيتۋسيانىڭ 52-بابىنا، «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋسيالىق زاڭنىڭ 24-بابى 3 جانە 8-تارماقتارىنا سايكەس ورتالىق سايلاۋ كوميسسياسى پارلامەنت ءماجىلىسىنىڭ دەپۋتاتى ۆ.ي. توحتاسۋنوۆتىڭ ءوتىنىش بەرۋىنە بايلانىستى ونىڭ وكىلەتتىگىن مەرزىمىنەن بۇرىن توقتاتۋعا اكەلەتىن نەگىز تۋىندادى دەپ قاۋلى ەتتى.
دەپۋتات ۆ.ي. توحتاسۋنوۆتىڭ وكىلەتتىگىن مەرزىمىنەن بۇرىن توقتاتۋ تۋرالى ۇسىنىم قازاقستان رەسپۋبليكاسى پارلامەنتىنىڭ ماجىلىسىنە ەنگىزىلدى.