تالدىقورعاندا ورتالىق ساياباق ساۋداعا قويىلدى
ساياباقتى جوندەۋگە ميلليارد تەڭگە جەتپەي، جەرگىلىكتى بيلىك ونى سەنىمگەرلىك باسقارۋعا بەرۋدى ۇيعاردى، دەپ حابارلايدى aqshamnews.kz
مۇنداي شەشىمگە اكىمدىك ساياباقتىڭ كۇتىمىنە كەتەتىن شىعىنداردىڭ كوپتىگى سەبەپتى كەلگەنگە ۇقسايدى. قالا تۇرعىندارىنىڭ سۇيىكتى دەمالىس ورنىنا اينالعان بۇل نىسان جاڭعىرتۋدى قاجەت ەتىپ تۇر.
بيىل ناۋرىز ايىندا تالدىقورعان قالاسىنىڭ ءتۇرعىن-ۇي كوممۋنالدىق شارۋاشىلىعى ءبولىمى (بالانس ۇستاۋشى) ورتالىق ساياباقتى كۇردەلى جوندەۋدەن وتكىزۋ ءۇشىن تەندەر جاريالاعان بولاتىن. بۇل ماقساتقا بيۋدجەتتەن ءبىر ميلليارد تەڭگەدەن استام قارجى بولىنگەن ەدى.
الايدا تاپسىرىس بەرۋشى كۇتپەگەن جەردەن تەندەردەن باس تارتتى. سول ۋاقىتتان بەرى جاڭا مەملەكەتتىك ساتىپ الۋ وتكىزىلگەن جوق. ونىڭ ورنىنا قاراشا ايىندا قالا اكىمى ەرنات ءبازىل ساياباقتىڭ 41 437 شارشى مەتر اۋماعىن سەنىمگەرلىك باسقارۋعا بەرۋ تۋرالى شەشىم شىعاردى.
اۋكسيونعا قاتىسقىسى كەلەتىن ۇمىتكەرلەر كەپىلدىك جارنا رەتىندە 5،6 ميلليون تەڭگەدەن استام قاراجات تولەۋى كەرەك.
ساياباقتىڭ تاعدىرى اۋكسيون ناتيجەسىنە بايلانىستى بولماق.