ەلوردادا قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن كەڭەيتىلگەن اپپاراتتىق كەڭەس ءوتتى، دەپ حابارلايدى aqshamnews.kz
جيىنعا مينيسترلىكتىڭ ۆەدومستۆولىق باعىنىستى ۇيىمدارىنىڭ، وڭىرلىك دەنە شىنىقتىرۋ جانە سپورت باسقارمالارىنىڭ باسشىلارى مەن وكىلدەرى قاتىسىپ، 2024 جىلدى قورىتىندىلادى. كەڭەستە وڭىرلىك سپورت باسقارمالارىنىڭ باسشىلارى مەن وكىلدەرى ءوز وبلىسىنداعى سپورت ينفراقۇرىلىمى، دەنە شىنىقتىرۋ مەن سپورتتى دامىتۋ، سونداي-اق جاستاردى سپورتقا باۋلۋ ماسەلەلەرى بويىنشا ەسەپ بەردى. سونىمەن قاتار وبلىستارداعى سپورتتىڭ جاي-كۇيى، قوردالانعان ماسەلەلەرى اشىق تالقىعا سالىنىپ، شەشۋ جولدارى ۇسىنىلدى.
مينيستر سپورتتىڭ قوعامداعى ماڭىزى مەن دەنە شىنىقتىرۋمەن اينالىسۋدىڭ ادام دەنساۋلىعى مەن ءومىر ساپاسىنا اسەرىن اتاپ ءوتتى. سونىمەن قاتار ول سپورت سالاسىنىڭ دامۋىندا كەزدەسەتىن كەدەرگىلەردى شەشۋگە باعىتتالعان ناقتى شارالاردى اشىق تالقىلاۋدىڭ قاجەتتىگىن جەتكىزدى. جيىندا سپورت ينفراقۇرىلىمىن دامىتۋ، اسىرەسە اۋىلدىق جەرلەردەگى سپورت الاڭدارىنىڭ سانىن كوبەيتۋ، مەملەكەتتىك-جەكەشەلىك ارىپتەستىك تەتىگىن قولدانا وتىرىپ جاڭا سپورت نىساندارىن سالۋ ماسەلەلەرى كوتەرىلدى. بۇدان باسقا، سپورت سالاسىنداعى كادرلاردى دايارلاۋ مەن ولاردىڭ بىلىكتىلىگىن ارتتىرۋ، سپورتشىلاردى قولداۋ شارالارىن كۇشەيتۋ تۋرالى دا ۇسىنىستار ايتىلدى.
ەربول مىرزابوسىنوۆ وڭىرلەردەگى سپورتتىڭ جاي-كۇيىن جان-جاقتى تالقىلاپ، ايماق سپورتىن دامىتۋعا قاتىستى ناقتى قادامداردى ايتتى. مينيستر الداعى ۋاقىتتا سپورت سالاسىنداعى جەتىستىكتەردى ارتتىرۋ ءۇشىن مەملەكەتتىك باعدارلامالاردى ىسكە اسىرۋ، وڭىرلىك باسقارمالاردىڭ جۇمىسىن ۇيلەستىرۋ جانە جەرگىلىكتى دەڭگەيدە سپورتتىق ءىس-شارالاردى كوبەيتۋ قاجەتتىگىن دە اتاپ ءوتتى.