الماتى قالاسىنىڭ پوليسيا دەپارتامەنتى ەرىكتىلەر مەن قوعامدىق ۇيىمداردىڭ الەۋەتىن ءتيىمدى پايدالانىپ، ولاردىڭ كومەگىمەن ءبىرقاتار ماڭىزدى ناتيجەلەرگە قول جەتكىزدى.
بۇگىندە دەپارتامەنت 6 ەرىكتىلەر قوزعالىسىمەن، 11 قوعامدىق قۇقىق قورعاۋ توبىمەن جانە 2 ۇكىمەتتىك ەمەس ۇيىممەن تىعىز بايلانىستا جۇمىس ىستەۋدە، دەپ حابارلايدى aqshamnews.kz Polisia.kz-كە سىلتەمە جاساپ.
2024 جىلدىڭ باسىنان بەرى ەرىكتىلەردىڭ قولداۋىمەن 9 قىلمىس اشىلىپ، 4 223 قۇقىق بۇزۋشىلىق انىقتالدى.15 مىڭ ەسىرتكى جارناماسى جويىلدى.113 ايەل مەن بالا تۇرمىستىق زورلىق-زومبىلىقتان قۇتقارىلدى. ءىز-تۇزسىز جوعالعان 227 ادام، سونىڭ ىشىندە 115 كامەلەتكە تولماعان بالا تابىلدى. 12 پروفيلاكتيكالىق ءىس-شارا ۇيىمداستىرىلدى. الماتى پوليسياسىنىڭ ەرەكشە سەرىكتەستەرى – ىشكى ىستەر مينيسترلىگىنىڭ ماڭىزدى جوباسى «جاس ساقشى» قوزعالىسىنىڭ وكىلدەرى. بۇل جاس پاتريوتتار توبى وتانسۇيگىشتىككە باۋلۋ جانە جاستاردى ازاماتتىق بەلسەندىلىككە تارتۋ باعىتىندا جۇمىس ىستەيدى.
ەرىكتىلەر مەن پوليسيا اراسىندا تىعىز ىنتىماقتاستىق ورناتۋ شەڭبەرىندە ۆولونتەرلەرگە الماتى پوليسياسىنىڭ قارۋ-جاراعى مەن ماتەريالدىق-تەحنيكالىق بازاسى تانىستىرىلدى. بۇل بىرلەسكەن جۇمىس ازاماتتىق قوعام مەن قۇقىق قورعاۋ ورگاندارىنىڭ ءوزارا ىقپالداستىعىنىڭ ايقىن ۇلگىسى.