بۇگىن، اباي كۇنىنە وراي الماتىداعى ا.پ.چەحوۆ اتاىنداعى ورتالىق قالالىق كىتاپحانادا تالقى وتىرىسى ءوتتى، دەپ حابارلايدى almaty-aqshamy.kz. ءىس-شارادا اباي شىعارمالارى، رۋحاني مۇراسى تالقىلاندى.
الماتى كىتاپحانالارى جانە الماتى قالاسى قازاقستان حالقى اسسامبلەياسىنىڭ انالار كەڭەسىمەن بىرلەسىپ وتكىزگەن شاراسى «ۇلى اباي حالىق جۇرەگىندە» دەپ اتالدى.
الماتى كىتاپحانالارى بىرلەستىگىنىڭ جالپى ماسەلەلەر جانە سيفرلاندىرۋ جونىندەگى ديرەكتورىنىڭ ورىنباسارى جاندوس جامبىل ۇلى شارانىڭ باستاۋ ءسوزىن سويلەدى. ول اباي كۇنىنىڭ مەرەكە رەتىندە اتالۋىنىڭ ءوزى ۇلى اقىننىڭ شىعارماشىلىعى مەن رۋحاني مۇراسىنا دەگەن حالقىمىزدىڭ قۇرمەتى ەكەنىن اتاپ ءوتتى.
بۇدان كەيىن اباي شىعارمالارىن ورىس تىلىنە اۋدارعان اۋدارماشىلاردىڭ ءبىرى، بەلگىلى اقىن باقىتجان قاناپيانوۆ ءسوز الدى. ول سوزىندە اباي شىعارمالارىنداعى ادامزاتقا ورتاق ىزگى قۇندىلىقتاردىڭ قاي تىلدەگى وقىرماندار ءۇشىن دە جات ەمەستىگىن باسا ايتىپ ءوتتى.
چەحوۆ اتىنداعى ورتالىق كىتاپحانادا وتكەن شارا اباي شىعارمالارىن، رۋحاني مۇراسىن زەرتتەۋ، جاس ۇرپاققا اباي تانىمى مەن گۋمانيستىك يدەيالارىن ءسىڭىرۋدى باستى ماقسات ەتتى. بۇعان قوسا، ءتۇرلى ۇلتتار مەن ەتنوستاردى قاۋىمداستىرعان مەملەكەتتەگى ۇلتتىق بىرەگەيلىكتى ساقتاۋدىڭ ماڭىزدىلىعىن تانۋعا دا باعىتتالعان.
اباي كۇنىندەگى ايتۋلى شارادا ۇلى تۇلعانىڭ شىعارماشىلىعىن ارقاۋ ەتكەن جاس جەتكىنشەكتەر ءوز ونەرىن كورسەتتى. جاس ونەرپازداردىڭ مەرەكەلىك قويىلىمدارى شارانىڭ مادەني بوياۋىن اشا ءتۇستى.