10 تامىزدا بۇكىل ەل بويىنشا قازاقتىڭ ۇلى اقىنى، فيلوسوفى جانە اعارتۋشىسى اباي كۇنى اتاپ اتالىپ وتەدى. اتاۋلى كۇنگە وراي الماتىنىڭ وڭىرلىك كوممۋنيكاسيالار قىزمەتىنىڭ الاڭىندا ءال-فارابي اتىنداعى قازۇۋ جانىنداعى اباي عىلىمي-زەرتتەۋ ينستيتۋتى پروفەسسورلارىنىڭ قاتىسۋىمەن بريفينگ ءوتتى، دەپ حابارلايدى almaty-akshamy.kz
اباي قۇنانبايەۆ قازاق جازبا ادەبيەتىنىڭ نەگىزىن قالاۋشى بولىپ سانالادى. اباي فەنومەنى ونىڭ امبەباپتىعىندا جاتىر، ول تەك كورنەكتى اقىن عانا ەمەس، سونىمەن قاتار پروزا شەبەرى بولدى، دەپ اتاپ ءوتتى ءال-فارابي اتىنداعى قازۇۋ جانىنداعى اباي عىلىمي-زەرتتەۋ ينستيتۋتىنىڭ قاۋىمداستىرىلعان پروفەسسورى، ساياسي عىلىمدار كانديداتى تورەگەلدى تۇياقباي.
«بۇگىن ەلىمىز ءۇشىن ەرەكشە كۇن - ۇلى اقىن اباي قۇنانبايەۆتىڭ تۋعان كۇنى. اباي قۇنانبايەۆتىڭ تۇلعاسى قازاق حالقىنىڭ عانا ەمەس، بۇكىل الەمنىڭ ومىرىندە ماڭىزدى ورىن الادى. بۇل اتاۋلى كۇن جىل سايىن جانە الەمدىك دەڭگەيدە اتاپ وتىلەتىنىنە سەنىمدىمىن. بۇعان سەبەپتەر دە جوق ەمەس، ويتكەنى شەت ەلدەردە اباي شىعارماشىلىعى مەن مۇراسىن ناسيحاتتاۋ جونىندەگى جۇمىس بىرنەشە جىل بۇرىن باستالعان بولاتىن. سونداي-اق، ەلىمىزدەگى كوپتەگەن مەكەمەلەر جىل سايىن اباي كۇنىنە ارنالعان ءىس-شارالار ۇيىمداستىراتىنىن اتاپ وتكەن ءجون. اتاپ ايتقاندا، اباي عىلىمي-زەرتتەۋ ينستيتۋتى حالىقارالىق عىلىمي كونفەرەنسيا وتكىزۋدى جوسپارلاپ وتىر»، - دەدى ول.
اباي كۇنىنە ارنالعان ءىس-شارالار جىل سايىن قازاقستاننىڭ شەت ەلدەردەگى ەلشىلىكتەرىندە وتەدى. ونىڭ شىعارمالارى جاقىن جانە الىس شەتەلدەردە باسىلىپ شىعارىلىپ، الەمنىڭ 100-دەن استام تىلىنە اۋدارىلعان.
ءال-فارابي اتىنداعى قازۇۋ جانىنداعى اباي عىلىمي-زەرتتەۋ ينستيتۋتىنىڭ قاۋىمداستىرىلعان پروفەسسورى، فيلولوگيا عىلىمدارىنىڭ كانديداتى ءلايلا مۇسالى ءوز كەزەگىندە 2020 جىلى قازاق حالقىنىڭ كورنەكتى اقىنى مەن ويشىلىنىڭ 175 جىلدىق مەرەيتويى حالىقارالىق دەڭگەيدە يۋنەسكو قامقورلىعىمەن اتاپ وتىلگەنىن ەسكە سالدى.
«مەملەكەت باسشىسى قاسىم-جومارت توقايەۆ اباي قۇنانبايەۆقا ارنالعان «اباي – رۋحاني رەفورماتور» اتتى جانە اقىننىڭ 175 جىلدىق مەرەيتويىنا ارنالعان «اباي جانە ءححى عاسىرداعى قازاقستان» اتتى ەكى ماقالا جازدى. اباي يدەيالارىنىڭ تۇجىرىمداماسى بۇرىنعىدان دا وزەكتى،اسىرەسە قازىرگى زاماندا. ابايدىڭ ءسوزى مەن ءىلىمى جاس ۇرپاقتىڭ ساناسىنا ءسىڭىپ، تاربيە جۇمىسىندا باسشىلىق قاعيداتقا اينالۋعا ءتيىس. سوندا عانا ءبىز گۋمانيست اباي ارمانداعان رۋحاني باي، تولىققاندى ادامدى تاربيەلەي الامىز. وسكەلەڭ ۇرپاق ءۇشىن دانىشپان تۇلعانىڭ قۇندى جانە بىرەگەي مۇراسىن ناسيحاتتاۋ ءبارىمىز ءۇشىن ورتاق مىندەت بولىپ قالا بەرەدى»، - دەپ اتاپ ءوتتى ول.
ل. جۇمالى 2009 جىلى ءال-فارابي اتىنداعى قازۇۋ جانىنان اشىلعان اباي ينستيتۋتى ءوز جۇمىسىن ءدال وسى باعىتتا جۇرگىزىپ جاتقانىن اتاپ ءوتتى. ينستيتۋت ماماندارى « ابايتانۋ». تاڭداۋلى ەڭبەكتەرى» اتتى 50 تومدىق ەڭبەكتى دايىنداپ،شىعاردى. اباي قۇنانبايەۆتىڭ 175 جىلدىعىنا وراي وسى ەڭبەك نەگىزىندە «ابايتانۋ انتولوگياسى» كىتابى دا جارىق كوردى. سونىمەن قاتار، اقىن مۇراسىنا ارنالعان عىلىمي-مادەني ءىس-شارالار وتكىزىلەدى.
ينستيتۋتتان باسقا، كوپتەگەن وقۋ ورىندارىندا، مەملەكەتتىك مەكەمەلەردە، قالالىق كىتاپحانالاردا بۇل كۇن كەڭىنەن اتاپ وتىلەدى.
ەستەرىڭىزگە سالا كەتەيىك، 10 تامىز - اباي كۇنى قازاقستان رەسپۋبليكاسىنىڭ مەرەكەلىك كۇنتىزبەسىنە ەنىپ، 2020 جىلدان باستاپ اتاپ ءوتىلىپ كەلەدى.