ورتالىق ازيا ەلدەرىنىڭ ۇزدىك تەحنولوگيالىق IT-ستارتاپتارى 500 مىڭ دوللارعا دەيىن ينۆەستيسيا تارتا الادى. بۇل ىسكە قازاقستاندا 7 ناۋرىزدا باستالاتىن Investment Readiness Accelerator باعدارلاماسى ىقپال ەتەدى. قازىرگى تاڭدا قاتىسۋشىلاردان وتىنىمدەردى قابىلداۋ جۇمىستارى جۇرگىزىلۋدە، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ۇيىمداستىرۋشىلاردىڭ ايتۋىنشا، باعدارلاما ءۇش بولىمنەن تۇرادى جانە ونلاينمەن قاتار وفلاين فورماتىندا وتەدى. يننوۆاتورلار زاڭ تۇرعىسىنان پراكتيكالىق ءبىلىم الا الادى، جوبانىڭ ءتيىمدى قارجىلىق مودەلىن قۇرۋدى، پيچ-دەك قۇرۋدى ۇيرەنەدى، سونداي-اق باسقا دا كوپتەگەن ماعلۇماتپەن اقپاراتتانادى. باعدارلامانىڭ رەسمي بولىگى اياقتالعاننان كەيىن قاتىسۋشىلار وزدەرىنىڭ ستارتاپتارىن تەك ورتالىق ازيادان عانا ەمەس، اقش-تان، ەۋروپادان كەلگەن ينۆەستورلارعا كورسەتە الادى.
«بارلىق اكسەلەراتوردىڭ تۇپكى ماقساتى مىنادا، جالپى، ءبىز كوپتەگەن كوماندانىڭ تاراپ كەتۋ سەبەبى ەشكىمگە قاجەت ەمەس ءونىمدى جاساپ شىعارعاندىعىندا ەمەس، تىڭ دۇنيەنى ويلاستىرا وتىرىپ وعان قولداۋشى، العاشقى ينۆەستيسيانى تابا المايتىندىعىندا ەكەنىن ايتقىمىز كەلەدى. تيىسىنشە، ودان كەيىن ستارتاپشىلاردىڭ توبى تاراپ جاتادى. ماسەلە ولار قاجەت ەمەس نارسەنى جاساپ شىعارعاندا ەمەس، سەنىمدى قولداۋ تابا الماعاندىعىندا. ءبىز وسى ماسەلەنى جىلدار بويى بايقاپ كەلەمىز. سوندىقتان دا اتالمىش باعدارلامانى جۇزەگە اسىرۋ ءجون دەپ شەشتىك»، - دەدى ورتالىق ازيانىڭ ءبىرىنشى ۆەنچۋرلىق قورىنىڭ باسقارۋشى سەرىكتەسى ءالىم حاميتوۆ.