اسكەري قىزمەتشىلەر اۋعان جاۋىنگەرلەرىن ەسكە الدى

كەڭەس اسكەرلەرىنىڭ سوڭعى لەگى اۋعانستاننان 1989 جىلدىڭ 15 اقپانىندا شىقتى.

قازاقستان قارۋلى كۇشتەرىنىڭ اسكەري بولىمدەرى مەن مەكەمەلەرىندە كەڭەس اسكەرلەرىنىڭ اۋعانستاننان شىعارىلعانىنا 33 جىل تولۋىنا وراي ءىس-شارالار وتكىزىلدى، دەپ حابارلايدى Almaty-akshamy.kz.

«ينتەرناسيوناليست جاۋىنگەرلەردىڭ ەسكەرتكىشتەرىنە گۇل شوقتارى قويىلدى. اۋعانستانداعى ۇرىس ءىس-قيمىلدارىنا قاتىسقان ارداگەرلەرمەن اسكەري قىزمەتشىلەردىڭ كەزدەسۋلەرى، «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى اراسىندا ەرلىك ساباقتارى ۇيىمداستىرىلدى. اۋعان سوعىسىنىڭ ارداگەرلەرى ءپاتريوتيزمنىڭ، وتانعا ادال قىزمەت ەتۋدىڭ جانە اسكەري بورىشتى ورىنداۋعا ءازىر بولۋدىڭ ماڭىزدى ەكەنىن ايتتى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.

نۇر-سۇلتان قالاسىنداعى قارۋلى كۇشتەردىڭ ۇلتتىق اسكەري-پاتريوتتىق ورتالىعىندا اۋعان جاۋىنگەرلەرىنە ارناپ كورمە مەن كونسەرت ۇيىمداستىرىلدى. 

كەڭەس اسكەرلەرىنىڭ سوڭعى لەگى اۋعانستاننان 1989 جىلدىڭ 15 اقپانىندا شىقتى. اۋعانستانداعى اسكەري ءىس-قيمىلدارعا قاتىسۋشىلار وزدەرىنىڭ اسكەري بورىشتارىن ابىرويمەن اتقارىپ، قازىرگى اسكەري قىزمەتشىلەر ءۇشىن باتىرلىقتىڭ، ەرلىكتىڭ ۇلگىسى بولىپ تابىلادى.

رەسمي ستاتيستيكاعا سۇيەنسەك، اۋعانستانداعى سوعىس قيمىلدارىنا 22 مىڭعا جۋىق قازاقستاندىق قاتىستى. ولاردىڭ 900-دەن استامى قازا تاپتى، 21 ادام حابار-وشارسىز كەتتى. اتاپ وتسەك، 4 300-دەن استام قازاقستاندىق جاۋىنگەر وردەندەرمەن جانە مەدالدارمەن ماراپاتتالدى، ولاردىڭ التاۋى كەڭەس وداعىنىڭ باتىرى، بىرەۋى حالىق قاھارمانى اتاعىن الدى.

بۇگىندە ەلىمىزدە 15 مىڭنان استام ينتەرناسيوناليست-جاۋىنگەر تۇرادى. كوبى ەلدىڭ قوعامدىق ومىرىنە بەلسەندى قاتىسىپ، جاستاردى اسكەري-پاتريوتتىق تاربيەلەۋ جۇمىسىنا اتسالىسادى.