ورتالىق ازيا ەلدەرى ايەلدەر ديالوگىنىڭ دەلەگاسياسى بريۋسسەلدە ەۋروپالىق وداقتىڭ وزىق تاجىريبەسىمەن تانىسۋدا.
2020-جىلى بۇۇ باستاماسىمەن قۇرىلعان ديالوگقا بيىل قازاقستان ءتوراعالىق ەتەدى. ايماققا مۇشە بەس مەملەكەتتىڭ بەلسەندى ايەلدەرىنەن قۇرالعان ديالوگ مۇشەلەرى ەۋروپالىق پارلامەنت، ەۋروپالىق كوميسسيا جانە قوعامدىق ۇيىم وكىلدەرىمەن كەزدەستى، دەپ حابارلايدى اlmaty-akshamy.kz qazaqstan.tv-گە سىلتەمە جاساپ. جيىندا، ايەلدەردىڭ كليماتتىڭ وزگەرۋى سىندى جاھاندىق پروبلەمالاردى شەشۋگە ات سالىسۋى، بەيبىتشىلىك پەن قاۋىپسىزدىكتى نىعايتۋداعى ءرولى ءسوز بولدى. بۇرىمدىلاردىڭ ەكونوميكالىق جاعدايى، ولاردىڭ قۇقىقتارىن كەڭەيتۋ دە قىزۋ تالقىلاندى. سونداي-اق، ەۋرووداق پەن ورتالىق ازيا وكىلدەرى گەندەرلىك تەڭدىك، ايەلدەرگە قارسى تۇرمىستىق زورلىق-زومبىلىقپەن كۇرەسكە باعىتتالعان شارالار بويىنشا ءوزارا پىكىر الماستى.
اندريس امەريكس، ەۋروپالىق پارلامەنتتىڭ دەپۋتاتى:
ەۋروپارلامەنتتە پرەزيدەنت، كوميتەتتىڭ ءتوراعاسى، پارتيا جەتەكشىسى بولسىن، بارلىعى، ياعني 705 دەپۋتات بىردەي جالاقى الادى. دەگەنمەن، ەۋرووداقتا جەكە كاسىپكەرلىكتە ايەلدەردىڭ جالاقىسى ەرلەرگە قاراعاندا 15 پايىزعا تومەن. وسى سىندى ماسەلەلەردى ورتالىق ازيادان كەلگەن دەلەگاسيا وكىلدەرىمەن قىزۋ تالقىلادىق.
ءدانيا ەسپايەۆا، ق ر پارلامەنتى ءماجىلىسى ءتوراعاسىنىڭ ورىنباسارى
ءقازىر قازاقستان پارلامەنتى ايەلدەرگە زورلىق-زومبىلىق كورسەتكەندەرگە جاۋاپكەرشىلىكتى كۇشەيتۋ تۋرالى زاڭ جوباسىن ازىرلەۋدە. سوڭعى وقيعالار جازانى قاتايتۋ قاجەتتىگىن كورسەتتى. جاڭا زاڭ بويىنشا اكىمشىلىك، قۇقىقتىق جازاعا تارتۋ جانە زورلىق-زومبىلىق ءۇشىن جازانى وتەۋ مولشەرىن كوبەيتۋىمىز كەرەك. وسى رەتتە بىزگە ەۋرووداقتىڭ تاجىريبەسىن يگەرۋ وتە ماڭىزدى.