ءورت سوندىرۋشىلەردىڭ جالاقىسى وسەتىن بولدى

ولاردىڭ جالاقىسى ۇلتتىق قاۋىپسىزدىك كوميتەتى ماماندارىنىڭ ەڭبەكاقىسىمەن تەڭەستىرىلەدى.

بۇل تۋرالى تجم ورتكە قارسى قىزمەت كوميتەتى ءتوراعاسىنىڭ ورىنباسارى دميتريي تيتوۆ مالىمدەدى، دەپ حابارلايدى Almaty-akshamy.kz Elorda.info-عا سىلتەمە جاساپ. 

توتەنشە جاعدايلار مينيسترلىگى وكىلىنىڭ ايتۋىنشا، ەلىمىزدە ءورت سوندىرۋشىلەر العاشقى جۇمىس جىلىندا شامامەن 115 مىڭ تەڭگە جالاقى الادى، ال ەڭبەك ءوتىلى 20 جىل بولسا، ونىڭ جالاقىسى 200 مىڭ تەڭگەدەن اسادى. ءقازىر جالاقى ماسەلەسىن شەشۋ مينيسترلىكتىڭ كۇن تارتىبىندە تۇر.

«بۇگىنگى تاڭدا توتەنشە جاعدايلار مينيسترلىگىنىڭ ماتەريالدىق-تەحنيكالىق جابدىقتالۋى 69 پروسەنتكە تەڭ. جىل سايىن بيۋدجەتتەن ءورت ءسوندىرۋ تەحنيكاسىن ساتىپ الۋعا ءتيىستى قاراجات بولىنەدى. ءبىراق ءبىز قولداناتىن اۆتوسيستەرنالاردىڭ باعاسى 90 ميلليون تەڭگەدەن اسادى. ەگەر پوليسيا قىزمەتىنىڭ كولىكتەرىمەن سالىستىراتىن بولساق، بىزدەگى تەحنيكا 8 ەسەگە قىمبات. سوندىقتان ەكى ۆەدومستۆوعا بىردەي سوما بولىنەدى دەيتىن بولساق، ءبىز باسقا ۆەدومستۆوعا قاراعاندا الدەقايدا از ماشينا ساتىپ الامىز. وسىنى ەسكەرگەن ءجون»، – دەدى دميتريي تيتوۆ.