ءورت سوندىرۋشىلەر ناۋرىزباي اۋدانىنداعى عيماراتتىڭ باسىم بولىگىن ورتتەن امان الىپ قالدى

ءورتتى اۋىزدىقتاۋعا 12 تەحنيكا مەن جەكە قۇرامنىڭ 40 قۇتقارۋشىسى جۇمىلدىرىلدى.

بۇگىن  11 ساعات: 33 مينۋتتا  الماتى قالالىق تجد 101 قىزمەتىنە ناۋرىزباي اۋدانىنداعى رايىمبەك داڭعىلى 548/2  مەكەن-جايىندا ءورت شىققانى تۋرالى حابارلاما كەلىپ ءتۇستى، دەپ حابارلايدى Almaty-akshamy.kz

ءورت سوندىرۋشىلەر كەلگەننەن كەيىن، ءبىر قاباتتى عيماراتتىڭ شاتىرى ورتەنىپ جاتقانىن انىقتادى. ءورت ءسوندىرۋ كۇشتەرى مەن قۇرالدارى جوعارى شاقىرتۋ دارەجەسى بويىنشا تارتىلدى. ءورت ورنىندا شتاب قۇرىلىپ، باتىس جانە وڭتۇستىك-شىعىس جاعىنان ەكى ءورت ءسوندىرۋ  ۋچاسكەسى قۇرىلدى، سۋ كوزدەرىنىڭ از بولۋىنا بايلانىستى، ورتكە قارسى پوەزد جۇمىلدىرىلىپ، ماگيسترالدى جەلى تارتىلىپ، وقپاندار ارقىلى ۇزدىكسىز سۋ بەرۋ قامتاماسىز ەتىلدى،  جانىپ جاتقان شاتىردىڭ قۇرىلىمدارىن  اشۋ ءۇشىن  ەكى ءورت ساتىسى ىسكە قوسىلدى.

ءورتتى ءسوندىرۋ جۇمىستارى كونسترۋكتيۆتىك ەرەكشەلىكتەرىنە بايلانىستى كۇردەلەنە ءتۇستى: شاتىر كوپ قاباتتى: بەتون پليتاسىنىڭ ۇستىنە بيتۋم ماستيكاسى، ونىڭ ۇستىنە مەتاللو- شيفەر توسەلگەن.

ءتىلسىز جاۋ 12:39-دا اۋىزدىقتالىپ، 12:47-دە ءسوندىرىلدى، جاقىن ورنالاسقان ەكى بوكسقا ءورتتىڭ تارالۋىنا جول بەرىلگەن جوق. ءقازىر قۇرىلىمداردى بولشەكتەۋ جانە توگۋ جۇمىستارى جۇرگىزىلۋدە.