الماتىدا قۇربان ايتتى مەرەكەلەۋدە كارانتيندىك شارالاردىڭ ساقتالۋىن باقىلاۋ جالعاسۋدا. قالاعا 600-دەن استام مال باسىن اكەلۋگە رۇقسات بەرىلگەن جوق.
ءراسىمدى تەك ءدىني قىزمەتكەر مەن سەنىمدى ادامدار ارنايى بەلگىلەنگەن جەردە وتكىزەدى. باسقا ازاماتتار qurban2021.kz سايت ارقىلى ونلاين رەجيمىندە قۇرباندىق شالۋ راسىمىنە تاپسىرىس بەرە الادى، دەپ حابارلايدى Almaty-akshamy.kz
الماتى قالاسىندا قاتاڭ شەكتەۋلەر قويىلعان. مال سويۋ سەحىنىڭ جۇمىسىنا، جاپپاي ءىس-شارالار، ۇجىمدىق ناماز، سونداي-اق مال اكەلۋگە تىيىم سالىندى.
قاسيەتتى مەرەكەگە وراي ءبىر جارىم كۇننىڭ ىشىندە مۇقتاج 1453 ادامعا قۇرباندىققا شالىنعان مالدىڭ ەتى تاراتىلدى. الماتىلىقتارعا كارانتين جاعدايىندا قۇربان ايت مەرەكەسىن تويلاۋ ەرەجەلەرى تاعى دا ەسكەرتىلدى.
الماتى قالاسىنىڭ اۋماعىندا پوليسيا مەن ۆەتباقىلاۋ بەكەتتەرى اشىلعان، ولار قالاعا مال اكەلىپ ساتۋعا تىرىسقان جانداردىڭ ارەكەتتەرىنە تىيىم سالادى. بۇل مەگاپوليستىڭ باس سانيتارلىق دارىگەرىنىڭ ايت كۇندەرى مال سويۋعا ءارى ساتۋعا تىيىم سالۋىنا بايلانىستى. ويتكەنى قۇرباندىق شالۋ راسىمىنە ادام كوپ جينالادى. بۇل كوروناۆيرۋس ينفەكسياسىنىڭ تارالۋىنا اكەلۋى مۇمكىن.
ق ر اشم ۆەتەريناريالىق باقىلاۋ جانە قاداعالاۋ كوميتەتىنىڭ الماتى قالاسى بويىنشا اۋماقتىق ينسپەكسياسىنىڭ دەرەكتەرى بويىنشا، كەزەكشىلىك كەزىندە ينسپەكسيا قىزمەتكەرلەرى 16 - 20 شىلدە ارالىعىندا قالادان تىس جەردە 31 ءىرى قارا مال، 571 ۇساق مال، 3 جىلقىنى كەرى قايتاردى.
«ينسپەكسيا قىزمەتكەرلەرى الماتى قالاسىنىڭ اۋماعىندا ۆەتەريناريالىق-سانيتارلىق باقىلاۋ مەن قاداعالاۋدى كۇشەيتتى. تۇرعىندارعا تۇسىندىرمە جۇمىستارى جۇرگىزىلدى، قالانىڭ بارلىق سەگىز اۋدانى تەكسەرىلدى. بازار مەن ەت كومبيناتتارى، مال سويۋ الاڭدارى، سونداي-اق قالا مەشىتتەرى تەكسەرىلدى»، - دەدى ق ر اشم ۆەتەريناريالىق باقىلاۋ جانە قاداعالاۋ كوميتەتىنىڭ الماتى قالاسى بويىنشا اۋماقتىق ينسپەكسياسىنىڭ بيولوگيالىق قاۋىپسىزدىك ءبولىمىنىڭ باسشىسى نۇرلان ءتاشىموۆ.
مال سويۋ سەحى مەن بازارلاردىڭ جۇمىسى توقتاتىلدى. مال سويۋ مەن ولاردى ساتۋعا تىيىم سالىندى. الايدا الاتاۋ اۋدانىندا بالقۋراي-مولودەجنايا كوشەلەرىنىڭ قيىلىسىندا بەلگىلەنبەگەن جەردە 100 باس ۇساق مال ساتۋ فاكتىلەرى انىقتالدى. ءتارتىپ بۇزۋشىلارعا تۇسىندىرمە جۇمىستارى جۇرگىزىلدى. اكەلگەن مالدارىن قالا سىرتىنا شىعارىپ تاستادى.
بۇگىندە قالا اۋداندارىندا زاڭسىز مال سويۋ مەن ساتۋ بويىنشا باقىلاۋ جۇمىستارى جالعاسۋدا. قالا ماڭىنا قويىلعان بەكەتتەر قۇربان ايت مەرەكەسىنىڭ سوڭىنا دەيىن جۇمىس ىستەيتىن بولادى.
الماتى قالاسى ءدىن ىستەرى باسقارماسى قالا تۇرعىندارىنا قۇربان ايت مەرەكەسىنە ارنالعان قۇرباندىق شالۋ ءراسىمى ءۇشىن بازار مەن جەكە مەنشىكتەردە ءتىرى مال ساتىپ الۋ مۇمكىن ەمەس دەپ الاڭداماۋعا شاقىردى. مۇنى ونلاين رەجيمدە جاساۋعا بولادى. ونىڭ الگوريتمىن مۇسىلمانداردىڭ ءدىني باسقارماسى جاساپ قويدى.
بۇگىندە 341 ەشكى، 112 قوي جانە 30 ءىرى قارا مالعا ونلاين تۇردە ءوتىنىش بەرىلدى. قۇرباندىق ەتىن شامامەن 1500 ادام الدى. بۇل شارا ءبارىمىز ءۇشىن جاقسى، ويتكەنى كوروناۆيرۋستى جۇقتىرۋ ءقاۋپى ەداۋىر تومەندەيدى دەيدى ءدىن قىزمەتكەرلەرى.
«ينتەرنەتتەگى قۇرباندىق تەك بەلگىلەنگەن جەردە بولادى. ءراسىمدى وتكىزۋگە ارنايى توپ بەكىتىلگەن، بوگدە ادامدارعا كىرۋگە تىيىم سالىنعان، بارلىق جۇمىس سانيتارلىق تالاپتارعا سايكەس جۇرگىزىلەتىن بولادى»، - دەدى الماتى قالاسى ورتالىق مەشىتىنىڭ نايب يمامى ماديار ءپىرىمقۇلوۆ.
ءدىن وكىلدەرى جۇرتشىلىقتى قۇربان ايت مەرەكەسىنە جاۋاپكەرشىلىكپەن قاراۋعا شاقىردى. بۇل كۇندەرى ۇيدە بولىپ، قوناققا بارماعان ءجون، ءارى ءىس-شارا ۇيىمداستىرماۋ كەرەك. قازىرگى كۇردەلى كەزەڭدە قالا تۇرعىندارى ۇلكەن جاۋاپكەرشىلىك تانىتىپ، ءقاۋىپتى ينفەكسيانىڭ تارالۋىنا توسقاۋىل بولۋلارى ءتيىس.