قازاقستاندا 1 ناۋرىز – ازاماتتىق قورعانىس كۇنى رەتىندە اتاپ وتىلەدى. بۇل كۇن ەلىمىزدەگى توتەنشە جاعدايلار قىزمەتىنىڭ ماڭىزدىلىعىن ناسيحاتتاۋعا، قاۋىپتەردىڭ الدىن الۋ جانە ولاردىڭ سالدارىن جويۋداعى ءرولىن كورسەتۋگە ارنالعان. بيىلعى مەرەكە جۇمىسشىلار جىلىمەن تۇسپا-تۇس كەلىپ وتىر. وسى ورايدا ءبىز ازاماتتاردىڭ قاۋىپسىزدىگى ءۇشىن كۇندەلىكتى ءوز ءومىرىن قاتەرگە تىگەتىن جانقيار جانداردىڭ ەڭبەكتەرىنە توقتالىپ، ولاردى قۇرمەتتەپ، العىس ءبىلدىرىپ، جۇمىستارىنىڭ ماڭىزدىلىعىن تاعى ءبىر مارتە اتاپ وتكەندى ءجون سانادىق.
ازامات سىن ساعاتتا سىنالادى
قالا كوشەلەرىندە دابىلىن قوسىپ، جۇيتكىپ بارا جاتقان ۇلكەن قىزىل ءتۇستى ءورت ءسوندىرۋ كولىگىن تالاي مارتە كورگەن بولارسىز. ال ونىڭ ىشىندە ءورت سوندىرۋشىلەر عانا ەمەس، اۋىر تەحنيكانىڭ تىزگىنىن ۇستاعان جۇرگىزۋشى دە ءوزىنىڭ ءقاۋىپتى مىندەتىنە اتتانىپ بارا جاتادى. سولاردىڭ ءبىرى – الماتىداعى توتەنشە جاعدايلار دەپارتامەنتىنىڭ بوستاندىق اۋدانى بويىنشا №1 مامانداندىرىلعان ءورت ءسوندىرۋ بولىمىندە ءورت ءسوندىرۋ اۆتوكولىگىن جۇرگىزۋ بويىنشا اعا نۇسقاۋشىسى قانات سايداحمەتوۆ. ءورت ءسوندىرۋ قىزمەتىندە 16 جىلعا جۋىق قىزمەت ەتىپ كەلە جاتقان ازامات قازىرگى تاڭدا اۆتوباسپالداعى بار ارنايى كولىكتى باسقارادى.
بۇل الىپ كولىك – كەز كەلگەن توتەنشە جاعداي ورنىنا ءبىرىنشى بولىپ جەتەتىن قۇتقارۋشى توپتىڭ قولعاناتى. ءبىراق ونى جۇرگىزۋدىڭ ۇلكەن جاۋاپكەرشىلىك پەن شەبەرلىكتى تالاپ ەتەتىنىن بىرەۋ بىلسە، بىرەۋ بىلە بەرمەيدى.
ءبىزدىڭ كەيىپكەرىمىز وسى جاۋاپكەرشىلىكتى ارقالاپ، 10 جىلدان بەرى ءورت ءسوندىرۋ كولىگىن جۇرگىزىپ كەلە جاتقان تاجىريبەلى مامان. ونىڭ جۇمىسى سىرت كوزگە جاي عانا كولىك جۇرگىزۋ بولىپ كورىنۋى مۇمكىن. ءبىراق شىن مانىندە، ادام تاعدىرى ءدال وسى كولىك جۇرگىزۋشىلەرىنىڭ كاسىبي شەبەرلىگىنە دە تىكەلەي بايلانىستى.
قانات سايداحمەتوۆ – الماتىداعى توتەنشە جاعدايلار دەپارتامەنتىنىڭ بوستاندىق اۋدانى بويىنشا №1 مامانداندىرىلعان ءورت ءسوندىرۋ بولىمىندە ءورت ءسوندىرۋ اۆتوكولىگىن جۇرگىزۋ بويىنشا اعا نۇسقاۋشى بولىپ ەڭبەك ەتەدى.
قاناتتىڭ قىزمەتى – تەك ءورت ورنىنا جىلدام جەتۋمەن شەكتەلمەيدى. ول كولىك پەن تەحنيكانىڭ ۇزدىكسىز جۇمىس ىستەۋىن قامتاماسىز ەتۋگە، بريگادا مۇشەلەرىنە بارىنشا قولايلى جاعداي جاساۋعا، قاجەتتى قۇرالداردىڭ تولىق بولۋىن قاداعالاۋعا جانە ءورت سوندىرۋشىلەردى ۇزدىكسىز سۋمەن قامتاماسىز ەتۋگە جاۋاپتى.
– ءبىزدىڭ مىندەت – حابار تۇسكەن سوڭ جەكە قۇرامدى جول ەرەجەلەرىن ساقتاي وتىرىپ، امان-ەسەن جەتكىزۋ. ءورت ورنىنا جەتكەن سوڭ، كولىكتىڭ تەحنيكالىق جاعدايىن ۇنەمى باقىلاپ وتىرامىز. سۋ، جانارماي، كوبىك قوسپاسى تاۋسىلماۋى كەرەك. ەگەر قانداي دا ءبىر اقاۋ بولسا، ونى دەرەۋ بولىمشە كومانديرىنە حابارلايمىز، – دەيدى ول.
قانات 2009 جىلى الماتى قالاسىنداعى №1 ءورت ءسوندىرۋ بولىمىنە قۇتقارۋشى بولىپ جۇمىسقا ورنالاسادى. قىزمەت بارىسىندا ءوزىن جاۋاپكەرشىلىگى مول، ۇقىپتى مامان رەتىندە كورسەتىپ، قوعامدىق جۇمىستارعا بەلسەنە اتسالىسا ءجۇرىپ، 2014 جىلى ءورت ءسوندىرۋ كولىگىنىڭ جۇرگىزۋشىسى قىزمەتىنە اۋىسقان. ءوز مىندەتىنە اسا جاۋاپكەرشىلىكپەن قارايتىن ونىڭ تىنىمسىز ەڭبەگى ەلەۋسىز قالعان جوق. 2022 جىلى اعا جۇرگىزۋشى-نۇسقاۋشى لاۋازىمىنا كوتەرىلىپ، سول ۋاقىتتان بەرى وسى قىزمەتتە قالتقىسىز ەڭبەك ەتىپ كەلەدى.
– مەن بۇل ماماندىقتى جانىممەن جاقسى كورەمىن. ءوزىمنىڭ ۇلىمدى دا وسى سالاعا شاقىرعان ەدىم، ءبىراق ول پوليسيا بولۋدى تاڭدادى. ال جۇبايىم سابيلەر ۇيىندە ەڭبەك ەتەدى. ءارقايسىمىز ءوز جۇمىسىمىزدى جاۋاپكەرشىلىكپەن اتقارىپ كەلەمىز، – دەيدى قانات.
ءار شاقىرتۋ – ۇلكەن جاۋاپكەرشىلىك
قاناتتىڭ ايتۋىنشا، ءورت ءسوندىرۋ قاراۋىلى كەزەكشىلىگىندە كولىك جۇرگىزۋشى ەڭ باستى مامانداردىڭ ءبىرى. ەگەر كولىك جۇرمەسە، اپات ورنىنا جەتۋىڭ ەكىتالاي. جولدا كەزدەسەتىن قيىندىقتارعا قاراماستان، بار كۇشىن سالىپ، ءوز مىندەتىن ابىرويمەن اتقارۋ – ونىڭ باستى مىندەتى.
– ءورت ءسوندىرۋ جاساعىندا جۇرگىزۋشىنىڭ ءرولى ەرەكشە. قاراۋىل قۇرامىندا ءبىر جەتەكشى، 2-3 بولىمشە كومانديرى جانە 6–10 ءورت ءسوندىرۋشى بولسا دا، جۇرگىزۋشى بولماسا، ولاردىڭ جۇمىسى توقتاپ قالادى. ماسەلەن، ءورت سوندىرۋشىلەردىڭ ءبىرى جاراقات السا نەمەسە اۋىرىپ قالسا، جاساقتىڭ جالپى دايىندىعىنا اسەر ەتپەۋى مۇمكىن. ءبىراق جۇرگىزۋشى ءورت ءسوندىرۋ كولىگىن دۇرىس باسقارماسا، ونى وقيعا ورنىنا ۋاقىتىلى جەتكىزبەسە نەمەسە سۋمەن قامتاماسىز ەتە الماسا، بۇكىل كوماندا ارەكەت ەتە الماي قالادى. ءبىز كولىكتىڭ تەحنيكالىق جارامدىلىعىن قاداعالاپ، ءورت سورعىسىن ىسكە قوسىپ، قاجەت بولعان جاعدايدا گيدرانتقا قوسۋ سياقتى ماڭىزدى مىندەتتەردى ورىندايمىز. سوندىقتان ءبىزدىڭ جاۋاپكەرشىلىگىمىز وتە جوعارى. ارينە، جۇمىس بولعان سوڭ قيىندىقتار بولادى. جول كەپتەلىسى، كەدەرگىلەر، ءقاۋىپتى جاعدايلار – بارىنە ۇيرەندىك. ءبىراق ءبىزدىڭ باستى مىندەتىمىز – وقيعا ورنىنا ۋاقىتىلى جەتۋ، دۇرىس شەشىم قابىلداۋ جانە ادامداردى قۇتقارۋ. سەبەبى، ۋاقىت – ادام ومىرىمەن ولشەنەدى. كاسىبىمنىڭ ماڭىزدىلىعىن تەرەڭ سەزىنەمىن جانە ءار شاقىرتۋ – ۇلكەن جاۋاپكەرشىلىك ەكەنىن ەشقاشان ۇمىتپايمىن، – دەيدى ول.
قانات بۇرىن اۆتوسيستەرنا جۇرگىزگەن، ءقازىر اۆتولەستنيساسى بار ارنايى كولىكتى باسقارادى.
«قازىرگى مىندەتىم – اۆتوباسپالداقتى دۇرىس قويۋ. مەنىڭ باستى ماقساتىم – جوعارعى قاباتتاردان سەكىرمەكشى بولعان ادامداردى قۇتقارۋ جانە بيىكتەن سۋ بەرۋ. كەيبىر جەرلەردە باسپالداقتى قويۋ قيىن. مىسالى، اعاشتار، ەلەكتر سىمدارى كەدەرگى كەلتىرەدى. وسىنداي جاعدايلاردا ىڭعايىنا قاراپ، دۇرىس ورنالاستىرۋىم كەرەك»، – دەيدى كەيىپكەر.
كولىك تىزگىندەگەن جىگىتتىڭ ايتۋىنشا، اۆتوباسپالداق جۇرگىزۋشىلەرى تەك ءورت سوندىرۋمەن عانا اينالىسپايدى. ولار كەيدە ادام ءومىرىن ساقتاپ قالۋدا سوڭعى ءۇمىت بولۋى مۇمكىن.
«كەيدە بيىك عيماراتتاردىڭ توبەسىنە شىعىپ، سەكىرمەكشى بولعان ادامدارعا كومەكتەسۋگە بارامىز. بىردە 9-قاباتتان سەكىرمەكشى بولعان ادامدى قۇتقارۋعا شىققانىمىز ەسىمدە. مۇنداي ساتتەردە ءار مينۋت ماڭىزدى. باسپالداقتى تەز ءارى ءدال قويۋ كەرەك، ايتپەسە كەش بولۋى مۇمكىن. ويتكەنى، ءبىر سەكۋند – ءبىر تاعدىر» – دەيدى ول.
ناعىز شەبەر قانداي قۇرمەتكە دە لايىق
قانات ءوزى كۋا بولعان الاپات ورتتەردىڭ بىرنەشەۋىن ەسىنە الدى. 2022 جىلى تاۋدا ءۇش قاباتتى ءۇي جانىپ، سۋدى الما-اراساننان جىبەرىپتى. سۋسىز اۋداندا ءورت شىققاندا، وزەننەن دە سۋ تاسىپ جۇمىس ىستەگەن ەكەن. قالانىڭ ۇلكەن بازارلارىندا بولعان ورتتەرگە تالاي رەت بارعان. كەشەگى اۋەزوۆ اۋدانىنداعى قويماداعى ورتتە شاتىردان سۋ بەرۋ ءۇشىن اۆتوباسپالداق كومەگىمەن جۇمىس ىستەپتى.
راس، بۇل ماماندىقتا ءار شاقىرتۋ – سىناق. ورتكە قارسى كۇرەستە تەك كۇش پەن جىلدامدىق قانا ەمەس، بىلىكتىلىك پەن تاجىريبە دە ماڭىزدى. كولىك تىزگىندەگەن ازامات ءوز ءىسىنىڭ ناعىز شەبەرى رەتىندە بىرنەشە مارتە ماراپاتقا يە بولعان.
– ەڭبەگىمدى باعالاعان باسشىلىق ۇنەمى مەرەيىمىزدى كوتەرىپ، ماراپاتتارعا ۇسىنىپ جاتادى. ماسەلەن، بىرنەشە جىل بۇرىن ق ر توتەنشە جاعدايلار ءمينيسترىنىڭ قولىنان ماراپاتقا يە بولدىم. كەيىن مەدەۋدە بولعان ورمان ورتىندەگى بەلسەندىلىگىم ءۇشىن الماتى قالاسىنىڭ اكىمى ەربولات دوسايەۆ العىس حاتپەن ماراپاتتادى، – دەيدى قانات.