الماتى – مۇمكىندىكتەر قالاسى. مۇندا ساپالى ءبىلىم الۋعا، جاقسى جۇمىس تابۋعا، كاسىپ باستاۋعا جانە ءومىر سۇرۋگە بارلىق جاعداي جاسالعان. دەگەنمەن، قالادا باسپانا ماسەلەسى ءارقاشان وزەكتى. اسىرەسە جاستار ءۇشىن الماتىدان ءۇي الۋ – ۇلكەن جەتىستىك.
قالادا جاس ماماندار مەن جاڭادان وتباسىن قۇرعان جاندار ءۇشىن باسپانالى بولۋعا ءتۇرلى باعدارلامالار قاراستىرىلعان. وسىنداي مۇمكىندىكتى پايدالانعان جاستاردىڭ ءبىرى – الماتى ەلەكترومەحانيكالىق كوللەدجىنىڭ وقىتۋشىسى تۇڭعىشباي امانحان.
ول 2020 جىلى «نۇرلى جەر» باعدارلاماسى ارقىلى ساتىپ الۋ قۇقىعىنسىز بەرىلەتىن جالدامالى پاتەرگە يە بولعان. العاشىندا الاتاۋ اۋدانى، «اقكەنت» ىقشاماۋدانىنداعى ەكى بولمەلى پاتەردە تۇرعان جاس وتباسى بەس جىل ىشىندە ءوز باسپاناسىنا قاراجات جيناۋعا مۇمكىندىك العان.
– ول كەزدە جاڭا عانا ۇيلەنگەن جاس جۇبايلار ەدىك. باعدارلامانىڭ ارقاسىندا اي سايىن نەبارى 11-12 مىڭ تەڭگە عانا تولەپ تۇردىق. ەگەر قاراپايىم جالدامالى پاتەردە تۇراتىن بولساق، 150-180 مىڭ تەڭگە تولەۋىمىزگە تۋرا كەلەر ەدى. ۇنەمدەلگەن قاراجاتتى وتباسى بانكىندەگى دەپوزيتكە جينادىق. ناتيجەسىندە «الماتى جاستارى» باعدارلاماسى ارقىلى 18 ميلليون تەڭگەگە جەكە ءۇي الدىق. ءقازىر ءۇش بالانىڭ اتا-اناسىمىز، – دەيدى تۇڭعىشباي امانحان.
جاس مامان مەملەكەت ۇسىنعان مۇمكىندىكتەردى ءتيىمدى پايدالانىپ، ءوز ارمانىنا قول جەتكىزگەنىن اتاپ ءوتتى.
– بۇل باعدارلاما بىزگە ۇلكەن كومەك بەردى. ەگەر جالدامالى پاتەرگە كوپ اقشا جۇمساساق، ءۇي الۋعا مۇمكىندىك بولماس ەدى. شىن نيەتتەنگەن ادام ماقساتىنا جەتەدى ەكەن. ارماندار ورىندالادى! – دەيدى ول.
تۇڭعىشباي امانحاننىڭ ەڭبەكقورلىعى – كوپتەگەن جاس وتباسىلارعا ۇلگى. باستىسى – ماقسات قويىپ، بەرىلگەن مۇمكىندىكتەردى پايدالانا ءبىلۋ. بۇگىندە الماتىدا جاستارعا ارنالعان «الماتى جاستارى»، «باقىتتى وتباسى»، «شاڭىراق» سىندى باسپانا باعدارلامالارى جۇمىس ىستەيدى. بۇل باعدارلامالار ارقىلى باسپانالى بولۋعا ءاربىر جاستىڭ مۇمكىندىگى بار.
الماتىدان ءۇي الۋ – كوپتەگەن جانداردىڭ ارمانى. باستىسى – ماقسات قويىپ، جۇيەلى تۇردە ارەكەت ەتۋ. مەملەكەت ۇسىنعان مۇمكىندىكتەردى ءتيىمدى پايدالانا بىلگەن ءاربىر جاس ءوز باسپاناسىنا قول جەتكىزە الادى. ەگەر ءسىز دە الماتىدان ءۇي الۋدى ارمانداساڭىز، تۇرعىن ءۇي باعدارلامالارى تۋرالى اقپارات الىپ، دۇرىس جوسپار قۇرۋدى بۇگىننەن باستاڭىز.