قوستاناي وبلىسىنا جۇمىس ساپارىمەن بارعان ق ر پرەمەر-مينيسترى ءاليحان سمايىلوۆ ورتالىق مەملەكەتتىك ورگاندار مەن اكىمدىك باسشىلارىنىڭ قاتىسۋىمەن ءوڭىردىڭ كەشەندى الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى. بۇل تۋرالى Almaty-akshamy.kz Inform.kz-كە سىلتەمە جاساپ حابارلايدى.
«تىكۇشاق تەحنيكاسىنىڭ جاقىن جەردەن سۋ الىپ، ءورتتى ءسوندىرۋىن جەڭىلدەتۋ ماقساتىندا ورمان القاپتارىنىڭ جانىنداعى سۋ قويمالارىنىڭ ءتۇبىن تەرەڭدەتۋ جۇمىستارىن جۇرگىزۋ قاجەت. ءبىز تىكۇشاقتار پاركىن ءۇش ەسە ۇلعايتۋ ءۇشىن قوسىمشا سۋقاشىرتقى قۇرىلعىلاردى ساتىپ الامىز، ولاردى ءورت ءسوندىرۋ ءۇشىن پايدالانۋعا بولادى. بۇل قوستاناي وبلىسىن قوسا العاندا، بارلىق وڭىرلەرگە قاتىستى»، — دەدى ءاليحان سمايىلوۆ.
كەڭەس بارىسىندا پرەمەر-مينيستر ءوڭىر اكىمدىگىنىڭ ءبىلىم بەرۋ سالاسىنداعى كەمشىلىكتەرىنە دە نازار اۋداردى. ءاليحان سمايىلوۆ ءوڭىردىڭ 7 مەكتەبىندە كۇردەلى جوندەۋ جۇمىستارىنىڭ اياقتالۋ مەرزىمىنىڭ كەشىكتىرىلگەنىن، سونىڭ سالدارىنان بالالار بەيىمدەلمەگەن جەرلەردە وقۋعا ءماجبۇر ەكەنىن اتاپ ءوتتى.
«بۇل پروبلەمانى شەشۋ ءۇشىن جەدەل شارالار قابىلداۋ قاجەت. جالپى ءبىلىم بەرۋ سالاسىنا جاۋاپكەرشىلىكپەن قاراۋ كەرەك، ويتكەنى بالالارعا وقۋ ءۇشىن ءتيىستى جاعدايلار جاسالۋى ءتيىس»، — دەپ اتاپ ءوتتى ءاليحان سمايىلوۆ.
ەكونوميكالىق ماسەلەلەر بويىنشا پرەمەر-مينيستر وبلىس تۇرعىندارىنىڭ ءال-اۋقاتىن ارتتىرۋ ءۇشىن بۇكىل ءوڭىردىڭ الەۋمەتتىك-ەكونوميكالىق دامۋىنا سەرپىن بەرە الاتىن ينۆەستيسيالىق جوبالاردى ىسكە قوسۋ بويىنشا جۇمىس جۇرگىزۋ قاجەتتىگىن اتاپ ءوتتى.
ونىڭ ايتۋىنشا، «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى جانە «اۋىل – ەل بەسىگى» باعدارلاماسى اياسىندا قوستاناي وبلىسىنا 32 اۋىلدىق ەلدى مەكەندە 75 جوبانى ىسكە اسىرۋعا 6،7 ملرد تەڭگە ءبولىندى. جالپى ءوڭىردى دامىتۋعا 2022 جىلى رەسپۋبليكالىق بيۋدجەتتەن 115،9 ملرد تەڭگە، سونداي-اق بيۋدجەتتى ناقتىلاۋ اياسىندا تاعى 31،7 ملرد تەڭگە ءبولىندى.
«بۇل قاراجات ەڭ الدىمەن الەۋمەتتىك قاجەتتىلىكتەرگە، وبلىستىڭ ينفراقۇرىلىمى مەن اگروونەركاسىپتىك كەشەنىن دامىتۋعا باعىتتالعان. اكىمدىك اتالعان قاراجاتتىڭ ءتيىمدى پايدالانىلۋىن قامتاماسىز ەتۋى ءتيىس»، — دەپ اتاپ ءوتتى پرەمەر-مينيستر.
ءاليحان سمايىلوۆ ازىق-تۇلىكتىڭ جەتىسپەۋشىلىگى مەن باعاسىنىڭ نەگىزسىز وسۋىنە جول بەرمەۋ بويىنشا جوسپارلى جۇمىس جۇرگىزۋ قاجەتتىگىنە دە نازار اۋداردى. ونىڭ ايتۋىنشا، اكىمدىك وسى باعىتتا قولدانىستاعى تەتىكتەردى پايدالانۋدى جانداندىرۋى كەرەك.
سونىمەن قاتار پرەمەر-مينيستر ءوڭىر ەكونوميكاسىن ودان ءارى ءارتاراپتاندىرۋدىڭ ماڭىزدىلىعىن اتاپ ءوتتى. ماسەلەن، 2022 جىلى وبلىستا $38 ملرد-قا 45 جاڭا جوبانى ىسكە قوسۋ جوسپارلانعان.
«ينۆەستيسيالىق جوبالاردى ىسكە قوسۋ جاڭا جۇمىس ورىندارىنىڭ اشىلۋىنا سەپتىك ەتەدى. وبلىس اكىمدىگى ينۆەستورلار ءۇشىن بارلىق قاجەتتى جاعدايلاردى جاساۋ جانە بەلگىلەنگەن جوبالاردى ۋاقىتىلى ىسكە قوسۋ جونىندەگى جۇمىستى جالعاستىرۋى كەرەك»، — دەدى ءاليحان سمايىلوۆ.
قورىتىندىلاي كەلە، پرەمەر-مينيستر جىلۋمەن جابدىقتاۋ جوبالارىن ىسكە اسىرۋعا قاراجات ءبولۋ ماسەلەسىن پىسىقتاۋدى، «قوستاناي-دەنيسوۆكا» كولىك جولىن رەكونسترۋكسيالاۋ جونىندەگى جوبانى ۋاقىتىلى قارجىلاندىرۋدى قامتاماسىز ەتۋدى، 2022 جىلدىڭ سوڭىنا دەيىن جەرگىلىكتى ماڭىزى بار جولداردىڭ جاعدايىن جاقسارتۋ جونىندە شارالار قابىلداۋدى تاپسىردى.
بۇدان باسقا، ءاليحان سمايىلوۆ وبلىستا بولاشاقتا كوپفۋنكسيونالدى مەديسينالىق مەكەمە بولىپ ۇلعايتىلاتىن جاڭا پەريناتالدىق ورتالىق سالۋ ماسەلەسىن، اۋليەكول اۋدانىنىڭ «دوستىق» بالالار مادەني جازعى ساۋىقتىرۋ كەشەنىن قالپىنا كەلتىرۋ ءۇشىن قاراجات ءبولۋ، سونداي-اق توبىل قالاسىندا ەمحانا قۇرىلىسىن قارجىلاندىرۋ جانە باسقا دا ءبىرقاتار ماسەلەلەردى پىسىقتاۋدى تاپسىردى.