ەركىن كۇرەستەن قازاقستاندىق بالۋان داۋلەت شابانباي «لوندون-2012» وليمپياداسىنىڭ قولا مەدالىمەن ماراپاتتالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
د.شابانبايعا وليمپيادا مەدالى سالتاناتتى تۇردە بەلگرادتا (سەربيا) وتكەن كۇرەستەن الەم چەمپيوناتىندا تابىستالدى. سپورتشى مەدالدى الەم كۇرەسىنىڭ بىرلەستىگى (UWW) باسشىسى، حوك اتقارۋ كوميتەتىنىڭ مۇشەسى نەناد ءلالوۆيچتىڭ قولىنان الدى.
«قۇدايعا شۇكىر، كوپتەن كۇتكەن مەدالدى الدىم! حالىقارالىق وليمپيادا كوميتەتىنە، الەم كۇرەسىنىڭ بىرلەستىگى پرەزيدەنتى نەناد لالوۆيچ مىرزاعا، قازاقستان رەسپۋبليكاسى ۇلتتىق وليمپيادا كوميتەتىنىڭ، ۇلتتىق فەدەراسيانىڭ باسشىلىعىنا العىسىم شەكسىز. ءارقايسىڭىزدىڭ جەكە قۇتتىقتاۋلارىڭىزعا راحمەت»، - دەدى د.شابانباي.
جۇلدەلەردى قايتا بولۋدەن كەيىن سپورتشى وليمپيادا ويىندارىنىڭ جەڭىمپازى بولدى. لوندونداعى وليمپيادادا داۋلەت شابانباي 120 كەلى سالماق دارەجەسىندە ونەر كورسەتىپ، بەسىنشى ورىنمەن اياقتادى.
الايدا، كەيىنىرەك 2019 جىلى دوپينگ سىنامالارىن قايتا تەكسەرگەننەن كەيىن، گرۋزين بالۋانى داۆيد مودزماناشۆيلي مەن ارتۋر تايمازوۆتىڭ (وزبەكستان) زاڭسىز ەسىرتكى قولدانعانى انىقتالدى.
بارلىق تەكسەرىستەردەن كەيىن بۇل سپورتشىلاردى ديسكۆاليفيكاسيالاۋ، سونداي-اق لوندون وليمپياداسىندا كورسەتكەن ناتيجەلەرىن جويۋ تۋرالى شەشىم قابىلداندى.
ناتيجەسىندە داۋلەت شابانباي وليمپيادا ويىندارىنىڭ قولا جۇلدەگەرى دەپ تانىلدى. كومەيل گاسەمي (يران) مەن بيليال ماحوۆ جەڭىس تۇعىرىنىڭ ءبىرىنشى ورنىن بولىسسە، قازاقستاندىقپەن بىرگە امەريكالىق تەرۆەل دلاگنيەۆ ءۇشىنشى ورىنعا كوتەرىلدى.