ورداباسىدا كىتاپتى كوپ وقيتىن وقۋشىلارعا قوزى بەرىلىپ جاتىر

دەمەۋشىلەر - اۋىل ازاماتتارى  

تۇركىستان وبلىسى ورداباسى اۋدانىندا كىتاپتى كوپ وقيتىن وقۋشىلارعا قوزى بەرىلىپ جاتىر، دەپ حابارلايدى Almaty-akshamy.kz قازاقپارات-قا سىلتەمە جاساپ. ورداباسى اۋدانىنداعى ءبورجار اۋىلدىق وكرۋگىنىڭ اكىمى سەرعالي قۇرىمبەكوۆ تىڭ باستامانى قولعا الدى. جازعى دەمالىس كەزىندە وقۋشىلاردىڭ كىتاپ وقۋعا قۇشتارلىعىن ارتتىرعان ول ەڭ ۇزدىكتەرىنە قوزى ۇلەستىرىپ بەرىپ جاتىر. وتكەن ايدا 3 بالا ۇيىنە قوزى جەتەكتەپ بارسا، بۇل ايدا جۇلدە قورى 5-كە كوبەيگەن. دەمەۋشىلەر دە - اۋىل ازاماتتارى. 

«ورداباسى اۋدانىنىڭ اكىمى باعلان باتىرشايەۆ ءار جينالىستا جۇمىستى جاڭا باعىتتا جۇرگىزۋ كەرەكتىگىن ايتىپ وتىرادى. سودان وسى يدەيانى ۇسىندىم. مۇنداعى ماقسات - «بالالار جىلىنا» وراي بالالاردى ىنتالاندىرۋ. سونداي-اق، سوڭعى كەزدە بالالار ۇيالى تەلەفوننان باس الماي قالدى. شومىلۋعا وزەن جاعالاپ كەتىپ قالاتىندارى دا بار. وسى جايتتاردى ويلاستىرا كەلە جاسوسپىرىمدەردىڭ كىتاپ وقۋعا قۇشتارلىعىن ارتتىرماق بولدىق. اۋىل ازاماتتارى نۇرسۇلتان ەلتايەۆ، نۇرجان بازاربايەۆ، قايرات بينازاروۆ قولداۋ ءبىلدىرىپ، دەمەۋشىلىك جاسادى»، - دەيدى اۋىل اكىمى سەرعالي قۇرىمبەكوۆ.

وتكەن ايدا جۇلدەگە تىگىلگەن ءۇش قوزى 6 سىنىپ وقۋشىلارىنا بۇيىرىپتى. ال، بۇل جولعى بەس قوزىنى بەرۋدە، ەرەجەگە ءبىرشاما وزگەرىستەر ەنگەن. ياعني، وقۋشىلار كىتاپتىڭ مازمۇنى بويىنشا تۇسىنىك ايتىپ بەرەدى. بۇل شارا تامىز ايىندا دا جالعاسىن تاپپاق.