كۇللى مۇسىلمان قاۋىمى الداعى 10 جىلدا ورازانى قىستا ۇستايدى.
شامامەن تەك 20 جىلدان كەيىن عانا جازدا اۋىز بەكىتۋگە بولادى، دەپ حابارلايدى aqshamnews.kz.
مۇنىڭ ءمانىسى نەدە؟ جارتى تاۋلىكتەن اساتىن جازداعى اۋىز بەكىتۋ مەن قىستىڭ قىسقا كۇنىندەگى قۇلشىلىقتىڭ ساۋابى بىردەي مە؟ رامازان ايى ھيجرا كۇنتىزبەسىمەن ەسەپتەلگەندىكتەن، جىل ساناپ 10-11 كۇنگە ەرتە كەلەدى. بيىل قاسيەتتى اي كوكتەمنىڭ باسىندا باستالسا، الداعى 10 جىل بويى ورازا قىس ايلارىنا ءتۇسىپ تۇر. ال بۇل مەزگىلدە كۇننىڭ قىسقارىپ، ءتۇننىڭ ۇزاراتىنى بەلگىلى. سوندىقتان اۋىز بەكىتكەن جاماعات ءۇشىن اس-اۋقاتتى ءىشۋ اراسى ۇزاققا سوزىلمايدى.
ەلدە 20 ملن-نان اسا ادام بولسا، سونىڭ 70%ء-ى ءوزىن مۇسىلمان سانايدى. جاراتۋشىسىنان مول ساۋاپ كۇتكەندەر، رامازان ايى كەلگەندە ورازا ۇستايدى. جازدىگۇنى 18 ساعاتقا دەيىن اۋىز بەكىتكەن ولار، ءقازىر ودان 6-7 ساعات كەم قۇلشىلىق قىلىپ ءجۇر. «مۇنىڭ ءوزى ەداۋىر جەڭىلدىك»، - دەيدى تۇرعىندار. بيىل الەمدە ەڭ ۇزاق ورازا يسلانديا، نوۆەگيا، فينليانديا سياقتى سولتۇستىك ەلدەردە 20-22 ساعاتقا سوزىلۋى مۇمكىن. ال ارگەنتينا مەن چيلي، اۋستراليانىڭ وڭتۇستىك ايماعىندا كەرىسىنشە 11 ساعات قانا بولماق. ەل اراسىندا «ۇزاق ۇستالعان ورازانىڭ ساۋابى دا مول بولادى»، - دەگەن پىكىر بار. مۇنى قازاقستان مۇسىلماندار ءدىني باسقارماسىنداعىلار جوققا شىعارمايدى. دەسە دە «قاي جەر، قاي مەزگىل بولسىن، دۇرىس نيەتپەن جاسالعان قۇلشىلىقتىڭ ساۋىبى دا از بولمايدى»، - دەيدى ءدىن وكىلدەرى.
اعابەك قونارباي ۇلى، قمدب باسپا ءسوز حاتشىسى:
- قىستا ورازا ۇستايسىز با؟ الدە شىلىڭگىر شىلدەدە ۇستايسىز با؟ ول جەردە ورازانى يحسان دارەجەسىندە، ياعني كەمەل تۇردە ۇستاۋعا وتە ماڭىز بەرۋ كەرەك. ويتكەنى، بۇل جەردە اللا تاعالا ءبىزدىڭ وزگەرگەنىمىزدى قالايدى. بۇل جەردە ورازانىڭ ەڭ كەمەل ءتۇرى ول جۇرەكپەن ورازا ۇستاۋ. ياعني، بۇكىل بولمىسىمىزبەن تۇلا بويىمىزدان جاماندىقتى كەتىرۋ. بۇل جەردە ەڭ باستى نارسە وزگەرۋ كەرەك.
«رامازان بۇل – جاقسىلىق جاساپ جارىساتىن اي. ال ورازا – ادامنىڭ ءوزىن-وزى تاربيەلەپ، سابىر مەن توزىمدىلىككە ۇيرەنىپ، جاراتۋشىسىنا جاقىنداتاتىن قۇلشىلىق. جالپى بۇل ايدا مۇسىلماندار رۋحاني تازارۋى ءتيىس. سوندىقتان الدىمەن ورازانىڭ ءمانىن ءتۇسىنىپ بارىپ قۇلشىلىق قىلۋ ابزال»، - دەيدى ءدىن ماماندارى.