بۇگىن - جازۋشى-دراماتۋرگ، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى ورالحان بوكەيدىڭ تۋعان كۇنى. ورالحان بوكەيدىڭ ويلارىن وقي وتىرىڭىز.
***
تەك قانا العا، العا عانا تۋرا تارتقان، جاستىق پەن جالتاقتىقتان ادا اساۋ باتىلدىق، بالتالاساڭ دا قىڭ ەتپەس باتىرلىق سىقىلدى بولعانىمەن، كوسەگەمىزدى كوگەرتپەس كوكبەتتىككە بوي الدىرار كىساپىرلىكتىڭ كورىگىن كوبىرەك باسىپ جۇرگەن جوقپىز با؟!
***
ماحاببات - ءتابيعات ءوزى بەرگەن قۇدىرەتتى سەزىم. ونداعى ەڭ ۇلكەن سىيلىق - اينىماس سىيلاستىق. ول اركىمگە دە ءتان قاسيەت، ال ناعىز سىيلاستىق كەز-كەلگەننىڭ قولىنان كەلمەيدى...
***
باقىت دەگەنىمىز ءار تاڭدى ءتىرى قارسى الىپ، ءار كۇندى كوزىمىزبەن شىعارىپ سالۋ. وزگەنىڭ ءبارى ءوزىڭدى الداۋ ءۇشىن تاپقان قيتۇرقىلار...
***
ءبىزدىڭ بىلەتىنىمىز: زامانا كوشى بايسالدانىپ، باياندى عۇمىر كەشكەن سايىن، ءومىر ءسۇرۋ جەڭىلدەپ، ساۋىق-سايران كوبەيگەن سايىن، سانامىز سارابدال تارتىپ، تاڭعاجايىپ وقيعانىڭ كۋاسى بولعان سايىن قۇلقىنىمىزعا قۇم تۇسكەندەي قاتال دا، قايىرىمسىز، ەشكىمگە دە، ەشنارسەگە دە سەنبەيتىن سەزىمسىز "سەرگەكتىك" جايلاعانداي ەدى...
***
دەر كەزىندە ولە بىلۋدەن ۇلكەن ونەردىڭ جوق ەكەنى سول، ونداي جاڭعىرىپ قايتا تۋار، قايتا جاسار يماندى تالانتتى سىزگە جازباعان، ءسىز بار بولعانى جەر بەتىمەن قي دومالاتقان قوڭىز پەندە عاناسىز، قانداي ايانىشتى مۇسكىندىك...
***
مىقتى بولساڭ قايتالاما مەنىڭ ءومىرىمدى، ءبورىنىڭ ارتىنان بولتىرىك اقىلدىلىعىنان ەرىپ جۇرگەن جوق.
***
ماڭگىلىككە ۇلاساتىن ۇلىلىق - جالعان دۇنيەنى مايشا شىلقىعان جالپاق تابانىمەن جالپاعىنان باسۋ ەمەس، ءتىپتى، ءىلىنىپ-سالىنىپ الجىعانشا جاساۋدا ەمەس، ارتىڭا وشپەس ءىز قالدىرىپ، ارعىماققا مىنگەندەي اسىعىس زۋلاپ وتە شىعۋ، ياعني ءوز ءومىرىڭدى وقىس ءارى ادەمى اياقتاتۋ.
***
باقيلىق عۇمىرىڭا جەتەر قايعى مەن قۋانىش ادام باسىندا ولشەۋلى عانا بولادى.
***
ءبىز قاتىگەزدەنىپ بارامىز، ءبىز يمانسىزدانىپ بارامىز، ءبىز اينالايىن انامىزدىڭ اق ءسۇتىن اقتاي الماي ءجۇرمىز. ءبىز بابامىزدىڭ باتاسىن ۇمىتتىق، ءبىز تاريحىمىزدى تاسپەن باستىرىپ، ءبىر كۇنى قىز-قىزدى قىزىققا ماستانىپ تاسىراڭدادىق، كوزىمىزدى شەل باستى، كوڭىلىمىز كور، جىگەرىمىز قۇم بولىپ قۇردىم داۋرەننىڭ ءالاۋلايىن شىرقاپ ءجۇرمىز... بەرەكەسى دە بەكەر ىشىم-جەمنىڭ ق ۇلى بولساق، ءبىز ءۇشىن جالعىز جانىن ساداقالاعان اتا-بابا ءارۋاعىنان ۇيات ەمەس پە؟! ءيا، ءارۋاققا ادالدىق، وتكەنگە يمان بولمايىنشا تىرىلەرگە سالاۋات جوق. ءتىپتى ءبىز كۇنى بۇگىنگە دەيىن ۇلتتىق ادامگەرشىلىك، يماندىق بەت-بەينەسى مەن بولمىسىن، كەلبەتى لايىقتىلىعىن انىقتاي الماي ءجۇرمىز...
دەرەككوزى: massaget.kz