ەلىمىزدە تاۋار ساتۋ ماقساتىندا پايدالانىلاتىن ينتەرنەت-رەسۋرستار «ساۋدا وبەكتىلەرىنە» تەڭەستىرىلمەك. بۇل تۋرالى ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ وتىرىسىندا ساۋدا جانە ينتەگراسيا ۆيسە-مينيسترى قايرات بالىقبايەۆ ايتتى، دەپ حابارلايدى اlmaty-akshamy.kz.
«2023 جىلدىڭ 6 ايىندا ونلاين ساۋداعا قاتىستى تۇتىنۋشىلاردىڭ ەلەكتروندىق ساۋدا سەگمەنتىنە شاعىمدارىنىڭ سانى 2021 جىلعا قاراعاندا 400 پايىز ءوستى. وسىنى ەسكەرە وتىرىپ، زاڭ جوباسىمەن شارتتاردا تۇتىنۋشىلاردىڭ قۇقىقتارى مەن زاڭدى مۇددەلەرىن بۇزاتىن جانە ولارعا قىسىم جاسايتىن تالاپتارعا جول بەرمەۋدى بەكىتۋ، سونداي-اق قۇقىقتىق ولقىلىقتاردى جويۋ، اتاپ ايتقاندا، تاۋارلاردى ساتۋ ماقساتىندا پايدالانىلاتىن ينتەرنەت-رەسۋرستاردى «ساۋدا وبەكتىلەرىنە» تەڭەستىرۋ ۇسىنىلادى»، - دەدى قايرات بالىقبايەۆ «تۇتىنۋشىلاردىڭ قۇقىقتارىن قورعاۋ تۋرالى» زاڭ جوباسىنىڭ جانە وعان ىلەسپە زاڭ جوباسىنىڭ تانىستىرىلىمى بارىسىندا.
ونىڭ اتاپ وتۋىنشە، بۇل ءوز كەزەگىندە بيزنەس سۋبەكتىلەرىن اقبتك 193-بابىنىڭ 1-بولىگى بويىنشا اكىمشىلىك جاۋاپكەرشىلىككە تارتۋعا مۇمكىندىك بەرەدى.
«سونىمەن قاتار زاڭ جوباسىندا قۇقىق قولدانۋ پراكتيكاسى مەن تۇتىنۋشىلاردى قۇقىقتىق قورعاۋدىڭ ناتيجەسىنە اسەر ەتەتىن ءارتۇرلى تۇسىندىرمەلەرى بار ءبىرقاتار قۇقىقتىق ولقىلىقتى، نورمانى جويۋ ۇسىنىلادى»، - دەدى ۆيسە-مينيستر.